O‘rganish davomida boshqaruv servis kompaniyasi rahbari Flora Yodgorova bilan uchrashuv o‘tkazilib, kompaniya tasarrufidagi 10 ta ko‘p qavatli uyda amalga oshirilayotgan ishlar, mavjud muammolar hamda ularni bartaraf etish yuzasidan olib borilayotgan chora-tadbirlar muhokama qilindi.

Ta'kidlanganidek, mazkur boshqaruv servis kompaniyasi faoliyati yuzasidan deputat tomonidan ilgari yuborilgan bir qator deputatlik so‘rovlari asosida ko‘tarilgan masalalar ijobiy hal etilgan. Shuningdek, ko‘p qavatli uylarni saqlash, joriy ta'mirlash, kommunal xizmatlar sifati, obodonlashtirish hamda aholiga ko‘rsatilayotgan xizmatlar holati atroflicha tahlil qilindi.

Uchrashuvda Xalq deputatlari Samarqand shahar Kengashi tomonidan boshqaruv servis kompaniyalari faoliyati yuzasidan olib borilayotgan nazorat ishlari, belgilangan vazifalar hamda sessiya kun tartibiga kiritilgan masalalar yuzasidan ham fikr almashildi.

Deputat tomonidan saylov okrugidagi boshqaruv servis kompaniyasi faoliyatini doimiy ravishda o‘rganib borish, aniqlangan kamchiliklarni bartaraf etish bo‘yicha tegishli takliflar ishlab chiqish hamda mazkur masalani Kengashning doimiy komissiyasi yig‘ilishida muhokama qilish yuzasidan zarur vazifalar belgilandi.

Ko‘p qavatli uylarni sifatli boshqarish, aholiga ko‘rsatilayotgan kommunal xizmatlar samaradorligini oshirish hamda boshqaruv servis kompaniyalari faoliyati ustidan deputatlik nazoratini kuchaytirish borasidagi ishlar izchil davom ettirilmoqda.