Xalq deputatlari Chilonzor tuman Kengashi deputati, O‘zbekiston Ekologik partiyasi a’zosi Tuganbekov Oybek Bahrombekovich o‘zi saylangan okrug hududidagi “Mehrjon” mahallasida olib borilayotgan obodonlashtirish ishlari hamda ko‘p qavatli uylarning ichki yo‘laklari (podyezdlari), yerto‘lalari, uylar atrofining tozaligi va tungi yoritish holatini joyiga chiqib o‘rgandi.

O‘rganish davomida mahalla hududidagi ko‘chalar va ko‘p qavatli uylar atrofi obodonlashtirilgani, sanitariya holati qoniqarli darajada ekani qayd etildi. Mahallada faoliyat yuritayotgan boshqaruv kompaniyasi tomonidan amalga oshirilayotgan ishlar yuzasidan fuqarolar o‘z minnatdorligini bildirib, xizmatlar sifatidan mamnun ekanliklarini ta’kidlashdi.

Shuningdek, mahalla hududida yashil hududlarni kengaytirish, daraxt va manzarali ko‘chatlarni parvarishlash hamda ko‘kalamzorlashtirish ishlari tizimli yo‘lga qo‘yilgani deputat tomonidan ko‘zdan kechirildi.

“Mehrjon” mahalla fuqarolar yig‘ini raisi tomonidan mahallada bolalar uchun zamonaviy o‘yingoh mavjudligi, uning yonidagi bo‘sh yer maydonidan samarali foydalanish maqsadida kichik o‘lchamdagi mini futbol maydonchasi barpo etish rejalashtirilayotgani ma’lum qilindi. Mazkur tashabbusni amalga oshirishda amaliy ko‘mak berish yuzasidan deputatga murojaat qilindi.

Deputat tomonidan ushbu taklifni tegishli mutasaddi tashkilotlar bilan hamkorlikda ko‘rib chiqish hamda imkoniyatlardan kelib chiqib ijobiy hal etish yuzasidan zarur choralar ko‘rilishi ta’kidlandi.

Hududlarda olib borilayotgan bunday o‘rganishlar fuqarolarni qiynayotgan masalalarni joyida aniqlash, mavjud muammolarni tezkor bartaraf etish hamda mahallalarni yanada obod va qulay maskanga aylantirishga xizmat qiladi.