Xalq deputatlari tuman Kengashining 2026-yilga belgilangan ish rejasiga muvofiq Kengash raisi O.Babayev, kotibiyat mudiri J.Sadirov, kotibiyat xodimi M.Tursunbayeva tomonlaridan markaziy dehqon bozoridagi “Elga xizmat” arzonlashtirilgan rastalarda aholini sifatli va arzon oziq-ovqat mahsulotlari bilan ta’minlash, ichki bozorda narx-navo barqarorligini ta’minlash hamda iste’molchilar huquqlarini himoya qilish bo‘yicha olib borilayotgan ishlar o‘rganildi.

O‘rganish davomida bozorda sotuvga qo‘yilgan asosiy turdagi oziq-ovqat mahsulotlari, jumladan un, non, go‘sht, sut va sut mahsulotlari, tuxum, shakar, o‘simlik yog‘i, kartoshka, piyoz, sabzi hamda boshqa qishloq xo‘jaligi mahsulotlarining narxlari tahlil qilindi. Shuningdek, mahsulotlarning sifati, saqlash sharoitlari va aholi uchun yaratilgan savdo xizmatlari holati ham ko‘zdan kechirildi.

Bozor ma’muriyati, tadbirkorlar va sotuvchilar bilan suhbat o‘tkazilib, mahsulotlar ta’minotida uzilishlarga yo‘l qo‘ymaslik, sun’iy narx oshirilishi holatlarining oldini olish hamda aholini doimiy ravishda arzon va sifatli mahsulotlar bilan ta’minlash yuzasidan fikr-mulohazalar bildirildi.

Monitoring jarayonida bozorga tashrif buyurgan fuqarolar bilan ham muloqot qilinib, ularning oziq-ovqat mahsulotlari narxlari, sifati va savdo xizmatlari bo‘yicha fikrlari o‘rganildi. Bildirilgan taklif va murojaatlar tegishli tartibda qayd etilib, mas’ul tashkilotlarga yetkazilishi belgilandi.