Unda shahar infratuzilmasini rivojlantirish, ichki bozorda narxlar barqarorligini ta’minlash hamda inflyatsiyani jilovlashga qaratilgan muhim masalalar muhokama qilindi.

Majlisga doimiy komissiya raisi E.Yunusov raislik qildi. Yig‘ilishda kotibiyat mudiri A.Ermatov, doimiy komissiya a’zolari hamda ekspert-maslahat guruhi vakillari ishtirok etdilar.
Kun tartibidagi birinchi masalada O‘zbekiston Respublikasi Vazirlar Mahkamasining 2024-yil 11-oktabrdagi 665-sonli qarori ijrosi doirasida shahardagi ichki yo‘llarni ta’mirlash va saqlash ishlari muhokama qilindi. Ta’kidlanganidek, mazkur ishlar mahalliy budjet mablag‘lari hisobidan amalga oshiriladi hamda buning uchun manzilli ro‘yxatlar shakllantirilmoqda. Ushbu chora-tadbirlar orqali mahallalardagi ichki yo‘llarning holatini yaxshilash, aholiga qulay infratuzilma yaratish maqsad qilingan.

Ikkinchi masala esa O‘zbekiston Respublikasi Vazirlar Mahkamasining 2026-yil 31-martdagi “Ichki iste’mol bozorida narxlar barqarorligini saqlash va inflyatsiyani belgilangan prognoz darajasida ta’minlashga qaratilgan qo‘shimcha chora-tadbirlar to‘g‘risida”gi 128-sonli qarori ijrosiga bag‘ishlandi.
Mazkur qarorga muvofiq, 2026-yilda inflyatsiya darajasini 6,5 foizdan oshirmaslik, keyingi yillarda esa uni 5 foiz atrofida barqaror saqlash vazifasi belgilangan. Shu maqsadda Marg‘ilon shahrida maxsus “Yo‘l xaritasi” ishlab chiqilgan bo‘lib, unda ichki bozorda asosiy iste’mol tovarlari uzluksizligini ta’minlash, mahalliy ishlab chiqarishni kengaytirish, import o‘rnini bosuvchi mahsulotlar hajmini oshirish, savdo va logistika tizimidagi ortiqcha vositachilikni qisqartirish kabi qator ustuvor yo‘nalishlar belgilab olindi.

Shuningdek, mavsumiy mahsulotlar narxlarining keskin oshib ketishini oldini olish maqsadida zaxira mexanizmlarini joriy etish, ijtimoiy ahamiyatga ega mahsulotlar narxlarini muntazam monitoring qilish hamda raqobat muhitini rivojlantirish orqali bozordagi asossiz narx oshishlarini kamaytirish masalalariga alohida e’tibor qaratildi.

Muhokama davomida “Yo‘l xaritasi”da har bir vazifa bo‘yicha aniq ijrochilar, amalga oshirish muddatlari va kutilayotgan natijalar belgilab olingani ta’kidlandi. Ushbu chora-tadbirlar shaharda inflyatsiya darajasini samarali nazorat qilish, aholining real daromadlarini himoya qilish va ijtimoiy barqarorlikni mustahkamlashga xizmat qilishi qayd etildi.

Yig‘ilish yakunida doimiy komissiya tomonidan har ikki masalani xalq deputatlari Marg‘ilon shahar Kengashining navbatdagi sessiyasi kun tartibiga kiritish yuzasidan tegishli qaror qabul qilindi.