Joriy yilining 7-may kuni Xalq deputatlari Uchquduq tuman Kengashiga 18-“O‘zbekiston” saylov okrugidan saylangan deputat L.Karimova tomonidan aholini sifatli, toza va uzluksiz ichimlik suvi bilan ta’minlash holatini o‘rganish maqsadida “Navoiy suv ta’minoti” AJ Uchquduq tuman bo‘limi faoliyati joyiga chiqqan holda o‘rganildi.

O‘rganish davomida hududdagi ko‘p qavatli uylar hamda yakka tartibdagi xonadonlarda sovuq suv ta’minotining bugungi holati, suv bosimi darajasi, quvurlarning texnik holati, avariya holatlarining oldini olish bo‘yicha amalga oshirilayotgan ishlar, shuningdek, aholining murojaatlari bilan ishlash tizimi yuzasidan mutasaddilar bilan atroflicha suhbat olib borildi.

Shuningdek, suv ta’minoti tizimida mavjud muammolar, ayrim hududlarda kuzatilayotgan uzilishlar, eskirgan quvurlarni yangilash hamda ichimlik suvini aholiga o‘z vaqtida yetkazib berish masalalari muhokama qilindi. Mutasaddilar tomonidan tizimda olib borilayotgan ta’mirlash va modernizatsiya ishlari, yangi tarmoqlarni tortish hamda nosozliklarni tezkor bartaraf etish yuzasidan amalga oshirilayotgan chora-tadbirlar haqida ma’lumot berildi.

Deputat L.Karimova tomonidan aholining kommunal xizmatlardan foydalanishdagi qulayliklarini oshirish, ichimlik suvi ta’minotidagi muammolarni tizimli hal etish, murojaatlarga tezkor va sifatli javob qaytarish hamda suv ta’minoti infratuzilmasini yanada yaxshilash bo‘yicha tegishli tavsiya va takliflar bildirildi.

Ta’kidlanganidek, aholini toza ichimlik suvi bilan barqaror ta’minlash, kommunal xizmatlar sifatini oshirish hamda fuqarolar murojaatlariga e’tiborli yondashish masalalari doimiy deputatlik nazoratida bo‘lib qoladi.