Bul ápiwayı oyın emes, ózbek futbolınıń úlken bayramı. Jáhán chempionatı saylap alıw basqıshınıń sońǵı ushırasıwı. Biraq sheber sportshılarımız mundial jollamasın múddetinen aldın naqlastırıp qoyǵan – Ózbekstan milliy saylandı komandası tariyxta birinshi márte futbol boyınsha jáhán chempionatında qatnasadı!

Bunı futboldı súyiwshi xalqımız kóp jıllar intizarlıq penen kútken edi. Milliy komandamız bunnan aldın jeti márte saylap alıw basqıshlarına qatnasıp, mundialǵa shıǵa almaǵan edi. Hámme waqıtta yamasa kalendar, yamasa gollar salıstırması, yamasa sheberlik jetispewshiligi sebep bolatuǵın edi.

Hesh qanday sebep-sıltawǵa orın qalmawı ushın bolsa futbolshılar kúshli hám tırnaq bekkem bolıwı kerek. Ózbekstan Respublikası Prezidentiniń 2018-jıl 16-marttaǵı qararı menen 2018-2022-jıllarda futboldı bunnan bılay da rawajlandırıw baǵdarlaması qabıl etilgen edi. Qábiletli jaslardı tańlap alıw, keyin ala professional etip tayarlaw jáne milliy saylandı komandalar rezervin jaratıw maqsetinde 14 aymaqta balalar hám jas óspirimler futbol akademiyaları shólkemlestirildi. Shınıǵıw hám jarıslardıń sapası arttı. Trenerler, tóreshiler hám basqa da qánigelerge itibar kúsheydi.

2019-jıl 4-dekabrde Prezidentimiz «Ózbekstanda futboldı rawajlandırıwdı pútkilley jańa basqıshqa alıp shıǵıw ilajları haqqında»ǵı pármanǵa qol qoydı. Onda klublardıń jumısın rawajlandırıw, xalıqaralıq dárejedegi qánigeler tayarlaw, saylandı komandalardıń oqıw-shınıǵıw procesin zamanagóy shólkemlestiriw, elimizde abıraylı jarıslar ótkeriw maqsetleri belgilengen edi. 2023-jıl 7-aprelde qabıl etilgen ǵalabalıq hám professional futboldı hár tárepleme rawajlandırıwǵa baylanıslı Prezident qararı da ayrıqsha áhmiyetke iye boldı.

Bunday itibar hám sistema sebepli izbe-iz nátiyjeler kele basladı. 2018-jılı U-23 komandamız Qıtayda, 2023-jılı U-20 futbolshılarımız Ózbekstanda ótkerilgen jarıslarda Aziya chempionlıǵın qolǵa kirgizdi. Elimizde FIFA hám AFK baǵdarlamasındaǵı turnirlerdi ótkeriw jolǵa qoyıldı.

2024-jılı ózbek futbolınıń rawajlanıwında jańa bet ashıldı – 23 jasqa shekemgi saylandı komandamız birinshi márte Olimpiada oyınlarında qatnastı.

Tabıs hám quwanıshlar bıyıl da dawam etpekte. Jaqında ǵana, aprel ayında Saudiya Arabstanında ótken jarısta 17 jasqa shekemgi jaslarımız Aziya kubogin qolǵa kirgizip, jáhán chempionatına jollama alǵan edi. Mine, endi tiykarǵı saylandı komandamız da jańa tariyx jarattı.

Ózbekstan usı 3-sanlı saylap alıw basqıshınıń «A» toparınan orın alǵan edi. Derlik bir jıl dawamında Iran, Qatar, Birlesken Arab Ámirlikleri, Qırǵızstan, Arqa Koreya futbolshıları menen bellesiw alıp barıldı. 5-iyun kúni bolıp ótken BAÁ – Ózbekstan oyınında teńbe-teń esapqa alındı. Nátiyjede 9-tur juwmaqlarına bola, saylandı komandamızdıń ochkoları sanı 18 ge jetti.

Prezidentimiz Shavkat Mirziyoev usı múnásibet penen jollaǵan qutlıqlawında futbolshılarımız haqıyqıy mártlik úlgisin kórsetip, xalqımızdıń ármanın ámelge asırǵanın atap ótti.

«Bul tariyxıy jetiskenlik xalqımızdı iygilikli maqsetler jolında jáne de birlestiredi, mıń-mıńlaǵan jaslarımız ushın ilham dáregi, ibrat tımsalına aylanadı, Jańa Ózbekstannıń xalıqaralıq abıray-mártebesin jáne de arttırıwǵa xızmet etedi, dep isenemen,» dedi mámleketimiz basshısı.

Shınında da, bul tariyxıy waqıya pútkil xalqımızdı birlestirdi, quwandırdı. Sonıń ushın da sońǵı turdaǵı Ózbekstan – Qatar oyını bayramǵa aylanıp ketti.

Ushırasıw óz jankúyerleri aldında oynaǵan jerleslerimizdiń tolıq ústinliginde ótti. Juwmaǵında Ózbekstan 3:0 esabında jeńiske eristi.

Ózbekstan Respublikası Prezidentiniń 5-iyundegi pármanına muwapıq, Watanımız tariyxında birinshi márte jáhán chempionatına jollamanı qolǵa kirgizgeni, jas áwladtı sportqa mehir hám milliy maqtanısh ruwxında tárbiyalawǵa qosqan úlesi ushın futbol boyınsha Ózbekstan milliy saylandı komandası aǵzalarınan hám trenerlerinen bir toparı sıylıqlanǵan edi

Oyınnan keyin usı sıylıqlardı tapsırıw máresimi boldı. Mámleketimiz basshısı qaharman sportshılarımızǵa húrmetli ataq, orden hám medallardı tapsırdı. Sonday-aq, saylandı komandamız aǵzaları hám qánigelerine BYD avtomobilleri sawǵa etildi.

Prezidentimiz benen oyındı Bolgariya Prezidenti Rumen Radev hám Slovakiya Bas ministri Robert Fico jáne Oraylıq Aziya mámleketleri húkimet basshıları birgelikte baqladı.

Futbol bayramı dronlar hám salyutler shouı menen juwmaqlandı.

2026-jılǵı jáhán chempionatı 11-iyunnan 19-iyulǵa shekem AQSh, Kanada hám Meksikada bolıp ótedi. 48 komanda 12 toparǵa bólinip bellesiw ótkeredi. Toparlarda birinshi-ekinshi orındı iyelegenler hám nátiyjeleri eń jaqsı 8 úshinshi orın iyeleri keyingi basqıshqa jol aladı. Ózbekstannıń maqtanıshı bolǵan futbolshılarımızdan bul jarısta da jaqsı nátiyjeler kútip qalamız.

Xalıq deputatları Moynaq rayonlıq Keńesi deputatı A.Jolımbetova

Slide 1 of 1