Халық депутатлары Шымбай районлық Кеңеси депутаты, ӨзХДП депутатлық топары ағзасы Х.Абдижалиев сайлаўшылар менен ушырасыўында «Гүлистан» МПЖ ҳәм «Тазғара» АПЖ аймағы турғынларын ағын суў менен тәмийинлеўши Айтеке жап салмасының дәслепки 500 метр аралығы тосылып қалғанлығы, сондай-ақ, «Гүлистан» МПЖ аймағында жайласқан Жақсылық көшесине ағын суў жеткерип бериў мақсетинде Айтеке жап салмасына труба қойып, жаңадан салма қаздырып бериў бойынша сайлаўшылар тәрепинен мүрәжатлар келип түскен еди. 

Депутат Х.Абдижалиев өз сайлаўшылары тәрепинен келип түскен жоқарыдағы мүрәжатлерди унамлы шешиў мақсетинде өз есабынан қаржылай жәрдем көрсетилди. 

Усы машқалалардың шешими бойынша алып барылып атырған жумыслар менен танысты, атап айтқанда, райондағы «Гүлистан» МПЖ ҳәм «Тазғара» АПЖ аймақларын ағын суў менен тәмийинлеўши Айтеке жап салмасының тосылып қалған дәслепки 500 метр аралығын қаздырыў нәтийжесинде 300 ден артық хожалықтың ағын суўға болған талабы жақсыланыўына ерисилди. Соның менен бирге, Жақсылық көшесине ағын суў жетип келетуғын салма жоқлығы себепли, депутат тәрепинен жаңадан салма қаздырылып, 3 орынға ағын суў ушын трубалар қойып берилди. Буның нәтийжесинде 62 хожалық ағын суў менен турақлы тәмийинлениўине ерисилди.

Депутат тәрепинен көрсетилген жәрдемлери ушын сайлаўшылар өз миннетдаршылығын билдирди.