Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston Liberal demokratik partiyasidan saylangan deputat E.Shokirov tomonidan tumanning “Xo‘jakent” mahallasi raisi A.Yusupov bilan mahalladagi jinoyatchilik bo‘yicha holat tahlil qilindi.

🔺Tahlil davomida mahallada sodir etilgan jinoyatlar holati atroflicha ko‘rib chiqilib, jinoyatchilikka olib kelishi mumkin bo‘lgan omillarga alohida e’tibor qaratildi. Xususan, hududda qasddan badanga yengil tan jarohati yetkazish, oilaviy zo‘ravonlik va o‘g‘rilik bilan bog‘liq jinoyatlar sodir etilgani ko‘rsatib o‘tildi. Shuningdek, mahallada ikki marta firibgarlik jinoyati sodir etilgani tahlil jarayonida ko‘rib chiqildi.

🔺Sodir etilgan jinoyatlardan kelib chiqib, ularning takrorlanishining oldini olish, aholi o‘rtasida huquqiy madaniyat va hushyorlikni oshirish, jinoyat sodir etilishiga imkon beruvchi holatlarni barvaqt aniqlash va bartaraf etish muhimligi ta’kidlandi. Amaldagi yondashuvlarda ham mahallalarda kriminogen vaziyatni muntazam o‘rganish, huquqbuzarliklarning sabab va shart-sharoitlarini aniqlash hamda profilaktik ishlarni manzilli tashkil etishga e’tibor qaratilgan.

🔺Shu bilan birga, mahallada aholining xavfsizligini ta’minlash maqsadida kuzatuv kameralarini o‘rnatish masalasiga e’tibor qaratildi. Ayniqsa, jinoyat sodir bo‘lishi ehtimoli yuqori bo‘lgan joylar, ko‘cha va yo‘laklar, aholi gavjum hududlarni aniqlab, ularda videokuzatuv imkoniyatlarini kengaytirish zarurligi qayd etildi.

🔺Aholi o‘rtasida hushyorlikni oshirish, mol-mulk xavfsizligiga e’tiborli bo‘lish, notanish shaxslar bilan munosabatlarda ehtiyotkorlikka rioya qilish, firibgarlik holatlariga aldanib qolmaslik hamda oilaviy nizolarning oldini olish bo‘yicha tushuntirish va profilaktika ishlarini kuchaytirish tavsiya etildi.