Ko‘p qavatli uylar holati va boshqaruv kompaniyalari faoliyati o‘rganildi

Xalq deputatlari Namangan shahar Kengashi kotibiyati mudiri N.Ubaydullayev, bosh mutaxassislar A.Nurmatov va M.Abdulmajidov tomonidan “Ma’rifat” MFY hududidagi boshqaruv kompaniyalari faoliyati samaradorligi hamda ko‘p qavatli uylarning saqlanish holati o‘rganildi.

O‘rganish davomida ko‘p qavatli uylarning ichki yo‘laklari (podyezdlari), yerto‘lalari, kirish-chiqish hududlari, bolalar maydonchalari va uylar atrofidagi hududlarning sanitariya holati, tozaligi hamda tungi yoritish tizimlarining ishlash darajasi ko‘zdan kechirildi.

Shuningdek, boshqaruv kompaniyalari tomonidan aholiga ko‘rsatilayotgan xizmatlar sifati, obodonlashtirish va tozalik ishlarining tashkil etilishi, mavjud muammolar hamda ularni bartaraf etish yuzasidan amalga oshirilayotgan chora-tadbirlar tahlil qilindi.

O‘rganish yakunlari bo‘yicha aniqlangan kamchiliklarni bartaraf etish, hududlarda sanitariya holatini yanada yaxshilash, yoritish tizimlaridagi nosozliklarni bartaraf etish hamda boshqaruv kompaniyalari faoliyati samaradorligini oshirish yuzasidan mas’ullarga tegishli tavsiya va ko‘rsatmalar berildi.