Mahallalardagi muammolar o‘rganilib, amaliy choralar belgilanmoqda

Xalq deputatlari Namangan shahar Kengashi deputati Bahodir Xalilov tomonidan saylov okrugiga kiruvchi Yakkatut, Guzar, Oltitosh va Sanoat mahallalarida o‘rganish ishlari olib borildi.

O‘rganishlar davomida mahallalarning ijtimoiy-iqtisodiy va infratuzilmaviy holati, aholini qiynab kelayotgan muammolar, hududlarni obodonlashtirish, ichki yo‘llar holati, kommunal xizmatlar sifati hamda boshqa dolzarb masalalar yuzasidan fuqarolarning fikr va takliflari tinglandi. Bildirilgan murojaatlar atroflicha o‘rganilib, ularni hal etish bo‘yicha tegishli chora-tadbirlar belgilab olindi.

Shuningdek, Guzar mahallasi hududidagi Tadbirkorlar ko‘chasida faoliyat yuritayotgan tadbirkorlar bilan uchrashuv o‘tkazildi. Uchrashuv davomida yo‘l infratuzilmasini yaxshilash, transport harakati uchun qulay shart-sharoitlar yaratish hamda hududda mavjud ayrim muammolarni bartaraf etish masalalari muhokama qilindi.

Tadbirkorlar tomonidan bildirilgan murojaatlar yuzasidan mas’ul tashkilotlarga deputatlik so‘rovlari kiritish hamda ularning ijrosini deputatlik nazoratiga olish bo‘yicha tegishli choralar belgilandi.

Xalq deputatlari Namangan shahar Kengashi deputatlari tomonidan aholi va tadbirkorlar bilan ochiq muloqot qilish, ularning muammo va takliflarini o‘rganish hamda mavjud masalalarning yechimiga ko‘maklashishga qaratilgan ishlar izchil davom ettirilmoqda.