#deputat_axboroti #poytaxtdeputatlari #deputatlik_faoliyati

❗️XALQ DEPUTATLARI TOSHKENT SHAHAR KENGASHI DEPUTATI SERIKBAY USENOV 2026-YILNING IKKINCHI CHORAGI BO‘YICHA SAYLOVCHILARGA AXBOROT BERDI

🏛 Xalq deputatlari Toshkent shahar Kengashining 34-“Turkiston” saylov okrugidan saylangan deputati Serikbay Usenov Yunusobod tumanida saylovchilar bilan uchrashib, 2026-yilning ikkinchi choragi davomida amalga oshirilgan deputatlik faoliyati, hududlarni kompleks rivojlantirish borasidagi ishlar hamda aholi murojaatlari yuzasidan ko‘rilgan choralar haqida hisobot berdi.

🤝 Uchrashuvda Yunusobod tumani hokimligi mas’ul xodimlari, Toshkent shahar Kengashi kotibiyati vakillari, “Turkiston”, “Katta Xasanboy”, “Astrobod”, “Tiklanish”, “Sharq Haqiqati” mahallalari raislari, “Mahalla yettiligi” a’zolari, faollar va fuqarolar ishtirok etdi.

🏗 Axborotda Katta Xasanboy, Turkiston va Astrobod mahallalarida kompleks rivojlantirish dasturi asosida keng ko‘lamli qurilish-montaj ishlari amalga oshirilgani alohida qayd etildi. Hududlarda ichki yo‘llarni asfaltlash, piyodalar yo‘laklarini barpo etish, sug‘orish tarmoqlarini yangilash, yashil hududlar yaratish, bolalar va sport maydonchalari qurish hamda ko‘p kvartirali uylarning fasadlarini ta’mirlash ishlari olib borildi.

🛣 Xususan, “Turkiston” mahallasida 1,5 kilometr yo‘lga asfalt qoplamasi yotqizilib, qariyb 2 kilometr piyodalar yo‘lagi zamonaviy ko‘rinishga keltirildi. Sug‘orish tizimlari yangilanib, 200 ga yaqin yangi ko‘chat ekildi, shuningdek zamonaviy bolalar maydonchasi tashkil etildi.

🏢 “Astrobod” mahallasida 8 ta ko‘p qavatli uyning fasad qismi ta’mirlandi, hududdagi qariyb 1 kilometr ichki ko‘cha asfaltlandi. Bundan tashqari, mahallaning 7-mavzesidagi 3-, 4-, 5- va 10-sonli uylar hududida bolalar maydonchasini tashkil etish bo‘yicha ham amaliy ishlar olib borilgani qayd etilgan.

🌳 “Katta Xasanboy” mahallasida qariyb 3 kilometr yo‘l mukammal ta’mirlandi. Aholiga qulaylik yaratish maqsadida yashil bog‘ tashkil etilib, uning hududida workout maydonchasi va bolalar o‘yingohi barpo etildi.

🏫 “Uch Qahramon” mahallasidagi 265-sonli umumta’lim maktabi tegishli dastur asosida mukammal ta’mirlanib, ta’lim muassasasida o‘quvchilar uchun yanada qulay sharoitlar yaratildi.

🔧 Shuningdek, okrugdagi muammolarni joyiga chiqib o‘rganish natijasida kanalizatsiya va issiqlik ta’minoti bilan bog‘liq ayrim masalalar ham bartaraf etildi. Jumladan, hududdagi 6-tor ko‘chada kanalizatsiya tarmog‘ining ta’mirtalab qismi qayta tiklangan, “Sharq Haqiqati” mahallasidagi 313-sonli maktabning yaroqsiz holga kelgan isitish tizimi quvurlari almashtirilgan.

🔺 Uchrashuv davomida mahalla ichki yo‘llari, ko‘cha yoritgichlari, kommunal infratuzilma, obodonlashtirish, bolalar maydonchalari va aholi xavfsizligiga oid masalalar ham muhokama qilindi. Xususan, “Sharq Haqiqati” mahallasi hududida yo‘l harakati xavfsizligi bilan bog‘liq masala ko‘tarilib, uni tegishli tashkilotlar bilan birgalikda o‘rganish zarurligi bildirildi.

🔎 Deputat fuqarolar tomonidan bildirilgan savol va takliflarni tinglab, qo‘shimcha o‘rganish talab etadigan masalalarni tegishli davlat organlari va tashkilotlariga kiritish, zarur hollarda deputatlik so‘rovlari yuborish hamda ularning ijrosini nazoratga olish bo‘yicha tegishli vazifalarni belgiladi.

✅ Yakunda Serikbay Usenov “Turkiston”, “Katta Xasanboy”, “Astrobod”, “Uch Qahramon”, “Sharq Haqiqati” va 34-“Turkiston” saylov okrugidagi boshqa mahallalarda aholi bilan ochiq muloqotni davom ettirish, infratuzilma va obodonlashtirish ishlarini izchil olib borish hamda fuqarolar murojaatlarini mas’ul tashkilotlar bilan hamkorlikda hal etish ustuvor vazifa bo‘lib qolishini ta’kidladi.

📱 Telegram 📱 Instagram 📱 Facebook 📱 YouTube 🔎 E-kengash