#deputatlik_nazorati_Uchtepa #deputat_so'rovi

🇺🇿 Xalq deputatlari Uchtepa tumani Kengashi "20-Xirmontepa" okrugi deputati Malikova Saodat Tolipovna tomonidan Uchtepa tumani hokimining qurilish, to‘siqlarsiz muhit yaratish, kommunikasiyalarni rivojlantirish, ekologiya va ko‘kalamzorlashtirish masalalari bo‘yicha o‘rinbosari – tuman Obodonlashtirish boshqarmasi boshlig‘i Nurali Ismatovga navbatdagi deputatlik so'rovi chiqarildi.

📁 Uchtepa tumani Katta Cho‘ponota mahallasi hududida fuqarolar bilan o‘tkazilgan uchrashuv hamda hududni o‘rganish davomida aholi tomonidan mahalla hududidan, xususan, Quyi Bo‘zsuv ko‘chasidan o‘tgan drenajning holati, uni o‘z vaqtida tozalash va tartibga keltirish zarurligi yuzasidan murojaatlar bildirilganligi, murojaat yuzasidan hududga chiqib o‘rganilganda, Quyi Bo‘zsuv ko‘chasidan o‘tgan drenaj o‘zanida turli chiqindilar, loyqa va boshqa yot jismlar to‘plangani, ayrim joylarda suv oqimiga to‘sqinlik qiluvchi holatlar mavjudligi, shuningdek, drenajni tozalash va uning suv o‘tkazish qobiliyatini tiklash zarurligi qayd etilgan.

📇 Mazkur holat, ayniqsa, yog‘ingarchilik mavsumida drenajning suv o‘tkazish qobiliyati pasayishi, suvning to‘planib qolishi hamda aholi va hudud infratuzilmasiga noqulayliklar kelib chiqishiga sabab bo‘lishi mumkinligi alohida ko'rsatilgan.

📈 Yuqoridagilardan kelib chiqib, Katta Cho‘ponota mahallasi hududidan, xususan, Quyi Bo‘zsuv ko‘chasidan o‘tgan drenajning holatini belgilangan tartibda o‘rganib chiqishingizni, drenaj o‘zanida to‘plangan loyqa, chiqindi va boshqa to‘siqlarni tozalash, suv o‘tkazish qobiliyatini tiklash hamda hududni sanitariya va obodonlashtirish talablariga muvofiq tartibga keltirish bo‘yicha zarur amaliy choralarni ko‘rish hamda drenajning kelgusida muntazam ravishda tozalanishi va texnik holati nazorat qilib borilishini ta’minlash yuzasidan tegishli choralar ko‘rilishini va ko‘rilgan choralar va erishilgan natijalar to‘g‘risida qonunchilikda belgilangan muddatlarda yozma javob taqdim etish so'ralmoqda.

🗣 Deputatlik so‘rovida ko‘tarilgan masala yuzasidan o‘rganish natijalari hamda amalga oshiriladigan ishlar bo‘yicha 10 kun muddatda asoslantirilgan ma’lumot taqdim etish talabi qo‘yilgan. Mazkur masala deputat tomonidan nazoratga olingan.