Xalq deputatlari Angor tumani Kengashining 2026-yil 12-martdagi VII-20-18-8-109-K/26-sonli qarori ijrosini taʼminlash, ajratilgan mablagʻlarning maqsadli va sifatli ishlatilishini nazorat qilish maqsadida joylarda oʻrganishlar qizgʻin davom etmoqda.

Xalq deputatlari Angor tumani Kengashi kotibiyat mudiri J. Raximqulov tomonidan 3-Gilambob saylov okrugi hududida boʻlib, mazkur loyiha doirasida amalga oshiriladigan ishlarni bevosita xonadonbay oʻrgandi.

J. Raximqulov 3-Gilambob saylov okrugi hududidagi "Gilambob" mahallasida istiqomat qiluvchi, ijtimoiy reyestrda turgan hamda koʻmakka muhtoj fuqarolar — Yuldashev Suyun Axmedovich hamda Shernazarov Panji xonadonlariga borib, u yerda olib boriladigan taʼmirlash ishlarining hajmi va tayyorgarlik jarayonlarini koʻzdan kechirdi.

Eslatib oʻtamiz: Mazkur Kengash qaroriga muvofiq, tumandagi I-guruh nogironligi boʻlgan va mehnatga layoqatli aʼzosi boʻlmagan 10 ta ehtiyojmand oilaning uylarini taʼmirlash hamda energiya samaradorligini oshirish belgilangan. Ushbu maqsadlar uchun "Infratuzilma va ijtimoiy barqarorlik" jamgʻarmasidan mablagʻ ajratilgan.
Oʻrganish davomida ushbu xonadonlarda amalga oshiriladigan quyidagi ishlarning rejalari kelishib olindi:
Uylarning devor va tomlarini issiqlik saqlaydigan qilib izolyatsiya qilish;
Energiya tejamkor zamonaviy eshik va derazalar oʻrnatish;
Mutlaqo bepul va muqobil elektr energiyasi beruvchi quyosh panellari yoki geliokollektorlar oʻrnatish.

Xonadon egalari bilan suhbatda ularning fikr va istaklari tinglandi. Kotibiyat mudiri tomonidan qurilish va jihozlash ishlarini sifatli tashkil etish, har bir soʻm mablagʻni oʻz muddatida va manzilli yetkazish boʻyicha masʼullarga tegishli tavsiyalar berildi.

Xalq vakillari va Kengash masʼullari tomonidan okruglardagi nazorat tadbirlari davom ettirilmoqda. Maqsadimiz bitta — tumanimizda inson qadrini ulugʻlash va eng muhtoj oilalarga munosib shukurona hayot kechirishlari uchun sharoit yaratish!