Xalq deputatlari Muzrabot tumani Kengashining korrupsiyaga qarshi kurashish, davlat organlarida ochiqlikni ta’minlash va huquqiy masalalar bo‘yicha doimiy komissiyasi raisi Tangirov Tursunqul, ijtimoiy soha, yoshlar siyosati, madaniyat va sport masalalari bo‘yicha doimiy komissiya a’zosi Mazluma Kenjayeva hamda tuman Kengashi kotibiyati bosh mutaxassisi B. Xoliqov hamkorligida O‘zbekiston Respublikasining 2020-yil 15-oktabrdagi O‘RQ–641-sonli “Nogironligi bo‘lgan shaxslarning huquqlari to‘g‘risida”gi Qonuni ijrosi yuzasidan Muzrabot tumani “Inson” ijtimoiy xizmatlar markazida o‘rganish ishlari olib borildi.

O‘rganish davomida markazning “Nogironligi bo‘lgan shaxslar bilan ishlash” sho‘basi faoliyati bilan tanishilib, qonun ijrosi, amalga oshirilayotgan ishlar, erishilgan natijalar hamda mavjud muammolar mas’ul xodimlar ishtirokida muhokama qilindi.

Ma’lum qilinishicha, bugungi kunda Muzrabot tumanida 4 858 nafar nogironligi bo‘lgan fuqaro istiqomat qiladi.

2026-yilning birinchi yarim yilligida:

🔹 39 turdagi 70,3 mln so‘mlik protez-ortopediya mahsulotlari;
🔹 170 turdagi 179,8 mln so‘mlik reabilitatsiya texnik vositalari ehtiyojmand fuqarolarga yetkazib berilgan.

Shu bilan birga, tumandagi 10 ta umumta’lim maktabida inklyuziv ta’lim yo‘lga qo‘yilgan bo‘lib, ularda 16 nafar nogironligi bo‘lgan o‘quvchi ta’lim olmoqda. Bundan tashqari, “Shaffof” mahallasidagi 1-sonli davlat maktabgacha ta’lim tashkilotida inklyuziv tarbiya guruhi faoliyat yuritib, unda 5 nafar bola tarbiyalanmoqda.

O‘rganish yakunida “Nogironligi bo‘lgan shaxslarning huquqlari to‘g‘risida”gi Qonun mazmun-mohiyatini aholi, ayniqsa mahallalar, ta’lim muassasalari o‘rtasida keng targ‘ib qilish, deputatlik nazoratini kuchaytirish hamda aniqlangan kamchiliklarni bartaraf etish yuzasidan tegishli tavsiya va ko‘rsatmalar berildi.