Oʻzbekiston Respublikasining Qonuni

Oʻzbekiston Respublikasida kichik tadbirkorlikni rivojlantirish, investitsiyalarni jalb etish va maxsus iqtisodiy zonalarning faoliyatini yanada soddalashtirish maqsadida “Maxsus iqtisodiy zonalar toʻgʻrisida”gi Qonunga muhim oʻzgartirish va qoʻshimchalar kiritildi.

Endi maxsus iqtisodiy zonalar direksiyalari keng vakolatga ega bo‘lib, ularning faoliyatini boshqarish va muvofiqlashtirish tizimi sezilarli darajada soddalashtiriladi. Shu bilan birga, investitsiya loyihalarini amalga oshirish jarayoni tezlashtiriladi, yer uchastkalari va bo‘sh turgan davlat mulki obyektlari elektron onlayn-auksion orqali ajratiladi, loyihalarning biznes-rejalari yoki texnik-iqtisodiy asoslariga ekspertiza xulosalari olish talabi bekor qilinadi.

Qonun maxsus iqtisodiy zonalarning ma’muriy kengashlarini tugatib, ularning vazifalarini direksiyalarga yuklatishni nazarda tutadi. Bu esa hududlarda investitsiyalarni jalb etishni osonlashtiradi, yangi ish oʻrinlarini yaratadi va aholining daromadlarini oshirishga xizmat qiladi.

Shuningdek, qonunchilikdagi o‘zgarishlar orqali maxsus iqtisodiy zonalarda investitsiya loyihalarini joylashtirish, yer uchastkalari va binolarni ajratish, infratuzilma loyihalarini amalga oshirish va daromadlarni shakllantirish jarayonlari yanada samarali boshqariladi.
Ushbu Qonun 2024-yil 16-iyulda Qonunchilik palatasi tomonidan qabul qilingan, 21-sentabrda Senat tomonidan maʼqullangan va rasmiy eʼlon qilingan kundan kuchga kiradi. Bu esa mamlakatimizda kichik tadbirkorlikni rivojlantirish va hududlarni iqtisodiy jihatdan mustahkamlash yo‘lida muhim qadam hisoblanadi.