🇺🇿 Xalq deputatlari Uchtepa tumani Kengashi kotibiyati mudiri Anvar Usmanov hamda Uchtepa tumani “Inson” ijtimoiy xizmatlar markazi direktori G‘ulom Eshatov tomonidan Mahalliy Kengash deputati faoliyatining eng muhim 24 ta yo‘nalishidan biri — “Nogironligi mavjud shaxslarga davlat tomonidan berilgan imtiyozlarning to‘g‘ri qo‘llanilishi holati” yuzasidan navbatdagi o‘rganish ishlari olib borildi.

🗂 O‘rganish davomida O‘zbekiston Respublikasi Prezidentining 2025-yil 8-maydagi PQ-171-son qarori hamda Vazirlar Mahkamasining 2025-yil 18-iyundagi 376-son qaroriga muvofiq 2025-yil 1-iyundan boshlab joriy etilgan “Faol hayotga qadam” dasturi ijrosi bilan tanishildi.

🔼 Mazkur dastur o‘zgalar parvarishiga muhtoj voyaga yetgan shaxslarni qo‘llab-quvvatlash, oilalardagi parvarish yukini yengillashtirish hamda ijtimoiy xizmatlar qamrovini kengaytirishga qaratilgan bo‘lib, fuqarolarning mehnat qilish va jamiyatda faol ishtirok etish imkoniyatlarini kengaytirishga xizmat qiladi.

↗️ Dastur doirasida 5 turdagi ijtimoiy xizmat joriy etilgan bo‘lib, murojaatchilarning ehtiyoji “Inson” ijtimoiy xizmatlar markazi tomonidan baholanadi va “Yagona milliy ijtimoiy himoya” axborot tizimida vaucher shakllantiriladi. Xizmatlar “Inson” markazlari bilan bir qatorda yakka tartibdagi tadbirkorlar, yuridik shaxslar hamda o‘zini o‘zi band qilgan shaxslar tomonidan ko‘rsatiladi, xarajatlar esa subsidiya asosida qoplab beriladi.

📝 Ushbu xizmatlar - uy sharoitida ijtimoiy-maishiy yordam, uy sharoitida qarab turish, tibbiy-ijtimoiy reabilitatsiya, kunduzgi qatnov asosida qarab turish hamda shaxsiy yordamchi xizmatlar ko'rsatishni o‘z ichiga oladi.

💬 O‘rganish davomida markaz faoliyati, yaratilgan sharoitlar hamda kelgusida amalga oshirilishi rejalashtirilgan vazifalar yuzasidan mutasaddilar bilan fikr almashildi va amaliy maslahatlashuvlar o‘tkazildi.

💼 Shuningdek, o‘rganish jarayonida Kengash kotibiyati bosh mutaxassisi Umidbek Abilov ham ishtirok etdi.