Xalq deputatlari Yunusobod tuman Kengashi deputati O.R. Kashkarov Toshkent shahrida bo‘lib o‘tgan “O‘zbekiston zoologiya fani: zamonaviy muammolar va rivojlanish istiqbollari” mavzusidagi xalqaro ilmiy-amaliy konferensiyada ishtirok etdi.

Konferensiya davomida O.R. Kashkarov O‘zbekistonda yo‘qolib ketish xavfi ostida turgan qush turi — katta tuvaloqni saqlab qolish muammolariga bag‘ishlangan ma’ruza bilan chiqish qildi.

Ma’ruzada mamlakatimizda biologik xilma-xillikni asrash, noyob qush turlarini muhofaza qilish hamda “Forish–G‘allaorol” davlat buyurtma qo‘riqxonasini tashkil etish bo‘yicha ilmiy asoslangan takliflar ilgari surildi.

Konferensiya ishtirokchilari O‘zbekistonda yo‘qolib borayotgan katta tuvaloqni saqlab qolishga qaratilgan ushbu tashabbusni qo‘llab-quvvatladilar.

Bu kabi tashabbuslar ekologik barqarorlikni ta’minlash, tabiatni muhofaza qilish va kelajak avlodlar uchun boy tabiiy merosni asrab-avaylashda muhim o‘rin tutadi.