Uchrashuv davomida mahalla xotin-qizlar faoli tomonidan amalga oshirilayotgan tashabbuslar, oilalarni qo‘llab-quvvatlash, bandlikni ta’minlash hamda ijtimoiy himoyaga muhtoj ayollar bilan ishlash borasidagi faoliyat samaradorligi muhokama qilindi.

Muloqot davomida deputat mahallalarda xotin-qizlar bilan ishlash tizimini yanada takomillashtirish, ularning muammolarini manzilli hal etish va ijtimoiy faolligini oshirish masalalariga alohida to‘xtaldi. Ta’kidlanganidek, bugungi kunda mahalla tizimi orqali ayollar bandligini ta’minlash, kasb-hunarga yo‘naltirish hamda tadbirkorlikka jalb etish borasida qator amaliy ishlar olib borilmoqda.

Mahalla xotin-qizlar faoli tomonidan hududdagi ehtiyojmand oilalar bilan ishlash, yosh kelin-qizlarni qo‘llab-quvvatlash, ularni hunarmandchilik va tadbirkorlikka yo‘naltirish yuzasidan amalga oshirilayotgan loyihalar haqida ma’lumot berildi.

Uchrashuv jarayonida xotin-qizlarni qiynayotgan ayrim masalalar ham ko‘tarildi. Jumladan, bandlik, imtiyozli kreditlar olish, tibbiy xizmat sifati hamda yoshlar tarbiyasi bilan bog‘liq taklif va murojaatlar deputat tomonidan tinglandi. Bildirilgan muammolarni hal etish yuzasidan tegishli tashkilotlar bilan hamkorlikda ishlash bo‘yicha tavsiyalar berildi.