Karmana tumani Narpay hududida O‘zbekiston Liberal-demokratik partiyasidan saylangan deputat, tuman hokimi Shohrux Boltayev boshchiligida fuqarolar uchun ommaviy qabul tashkil etildi.

Qabulda 500 nafardan ortiq karmanalik fuqarolar o‘z murojaatlari bilan ishtirok etdi. Fuqarolar tomonidan bildirilgan masalalar tuman hokimi-deputat, tuman prokurori, ichki ishlar bo‘limi boshlig‘i hamda tuman DSI rahbarlari tomonidan alohida tinglandi.

Shuningdek, 300 nafardan ortiq tadbirkor va korxona rahbarlari ham murojaatlari bilan qatnashdi. Murojaatlarning asosiy qismini tadbirkorlik faoliyatini kengaytirish, yer ajratish, kredit olish, infratuzilma va ishbilarmonlik muhitini yaxshilash bilan bog‘liq masalalar tashkil etdi.

Qabul davomida ko‘plab murojaatlar joyida ijobiy hal etildi. Qo‘shimcha vaqt va o‘rganish talab etadigan masalalar yuzasidan esa mas’ul tashkilot rahbarlariga aniq topshiriqlar berildi.

Tuman rahbariyati tomonidan har bir murojaatni atroflicha ko‘rib chiqish, aholini qiynab kelayotgan muammolarga amaliy yechim topish hamda fuqarolar roziligini ta’minlashga alohida e’tibor qaratildi.