Xalq deputatlari Qo‘qon shahar Kengashi deputati R.Talipdjanov tomonidan o‘z saylov okrugi tarkibidagi “Navro‘z” mahalla fuqarolar yig‘inida aholi bilan birgalikda hududdagi mavjud muammolarni o‘rganish ishlari olib borildi.

O‘rganish jarayonida mahalla aholisi tomonidan ko‘tarilgan murojaatlar va hududdagi dolzarb masalalar joyiga chiqib atroflicha ko‘zdan kechirildi. Xususan, yangi qurilgan ko‘p qavatli uylar atrofida obodonlashtirish ishlarini olib borish, hududni tartibga keltirish hamda yashash sharoitlarini yaxshilash masalalariga alohida e’tibor qaratildi.

Shuningdek, oqava suv tarmoqlarining nosoz holati, sanitariya qoidalariga rioya etilishi, ekologik muhitni yaxshilash hamda hududda tozalikni ta’minlash bilan bog‘liq muammolar yuzasidan fuqarolar tomonidan qator murojaatlar bildirildi.

Deputat tomonidan aholi bilan ochiq muloqot o‘tkazilib, mavjud muammolarni bartaraf etish bo‘yicha tegishli tashkilotlar bilan hamkorlikda ish olib borilishi ta’kidlandi. Mazkur masalalarni ijobiy hal etish maqsadida mutasaddi tashkilotlarga deputatlik so‘rovlari yuborishga kelishib olindi.

Ta’kidlanganidek, hududlarda aholi bilan bevosita ishlash, muammolarni joyida o‘rganish va ularni amaliy hal etish deputatlik faoliyatining muhim yo‘nalishlaridan biri hisoblanadi.

Mazkur o‘rganish ishlari hudud infratuzilmasini yaxshilash, ekologik holatni barqarorlashtirish hamda fuqarolar uchun qulay yashash muhitini yaratishga xizmat qiladi.

Xalq deputatlari Qo‘qon shahar Kengashi