Xalq deputatlari Qo‘qon shahar Kengashi deputati M.Yunusov tomonidan aholi murojaatlari asosida “Shohidon” ko‘chasida boshlangan joriy ta’mirlash ishlari o‘rganildi.

O‘rganish jarayonida yo‘lning nosoz qismlarini bartaraf etish, asfalt qoplamasini yangilash hamda ishlarning texnik talablarga muvofiq olib borilishi masalalariga alohida e’tibor qaratildi. Deputat tomonidan mas’ul tashkilotlar vakillariga ish sifatini ta’minlash va belgilangan muddatlarga amal qilish yuzasidan tegishli tavsiyalar berildi.

Shuningdek, hudud aholisi bilan muloqot o‘tkazilib, ularning fikr va takliflari tinglandi. Fuqarolar tomonidan yo‘l infratuzilmasini yaxshilash borasida amalga oshirilayotgan ishlarga ijobiy munosabat bildirildi.

Ta’kidlanganidek, mazkur ta’mirlash ishlari yakuniga yetkazilgach, ko‘chada piyodalar va avtotransport vositalari harakati uchun yanada qulay sharoitlar yaratiladi.

Xalq deputatlari Qo‘qon shahar Kengashi