Xalq deputatlari Sardoba tumani Kengashi deputati J. Otajonov tashabbusi bilan tuman tibbiyot birlashmasida aholiga ko‘rsatilayotgan tibbiy xizmatlar sifatini oshirish, fuqarolarning tibbiy madaniyatini yuksaltirish hamda sog‘lom turmush tarzini targ‘ib qilishga qaratilgan targ‘ibot tadbirlari tashkil etildi.

Mazkur tadbir davomida tibbiyot xodimlari tomonidan fuqarolarga profilaktik ko‘riklarning ahamiyati, kasalliklarni erta aniqlash va davolash usullari, shuningdek, davlat tomonidan yaratilgan imtiyoz va imkoniyatlar haqida batafsil ma’lumotlar berildi. Shu bilan birga, ishtirokchilarning savollariga mutaxassislar tomonidan atroflicha javoblar qaytarildi.

Deputat J. Otajonov o‘z so‘zida aholining salomatligini muhofaza qilish ustuvor vazifalardan biri ekanini ta’kidlab, bu kabi targ‘ibot ishlari fuqarolarning tibbiy xizmatlardan to‘g‘ri va samarali foydalanishida muhim ahamiyat kasb etishini qayd etdi.

Tadbir yakunida fuqarolarga sog‘lom turmush tarziga rioya qilish, muntazam tibbiy ko‘rikdan o‘tib turish hamda o‘z salomatligiga befarq bo‘lmaslik bo‘yicha tavsiyalar berildi.