Bul dógerek sáwbetinde máhálle belsendileri, nuraniylar, jaslar hám jámiyetcshilik wákilleri qatnastı. Ushırasıwdan gózlengen tiykarǵı maqset - xalıq penen tikkeley sóylesiw, puqaralardı qızıqtırıp atırǵan máselelerdi tıńlaw, olardıń usınıs hám múrájatların úyreniwden ibarat boldı. 

Dógerek sáwbeti dawamında máhálle aymaǵındaǵı sociallıq-ekonomikalıq máseleler, xalıqtı jumıs penen támiyinlew, abadanlastırıw jumısları, kommunallıq xızmetlerdiń sapası, jol hám infrastruktura jaǵdayı, bilimlendiriw hám densawlıqtı saqlaw tarawlarındaǵı bar mashqalalar dodalandı. Sonday-aq, jaslardıń bántligi, hayal-qızlardıń belsendiligin arttırıw, kem támiyinlengen shańaraqlardı qollap-quwatlaw máselelerine de ayrıqsha itibar qaratıldı. 

Puqaralar tárepinen bildirilgen usınıs hám múrájatlar deputat tárepinen dıqqat penen tıńlanıp, ayırım máseleler boyınsha tiyisli shólkemler menen birgelikte ámeliy ilajlar kóriw belgilendi. Ayırım mashqalalardı sheshiw boyınsha anıq wazıypalar hám orınlaw múddetleri belgilep alındı. 

Ushırasıw juwmaǵında deputat G.Bekbosinova bunday ashıq sóylesiwler xalıqtıń dárti hám mútájliklerin úyreniwde úlken áhmiyetke iye ekenin atap ótip, keleshekte de puqaralar menen tikkeley ushırasıwlar turaqlı shólkemlestiriletuǵının málim etti.