Aholini sifatli va xavfsiz oziq-ovqat mahsulotlari bilan ta’minlash, shuningdek bozorlarda narx-navoni sun’iy oshirish holatlarining oldini olish maqsadida Jalaquduq tumanida deputatlik nazorati tadbirlari tashkil etildi. Ushbu masala yuzasidan Xalq deputatlari Jalaquduq tuman Kengashi deputatlari O.Xolmurotova va B.Bazarova, shuningdek tuman Sanitariya-epidemiologik osoyishtalik va jamoat salomatligi xizmati sanitariya vrach yordamchisi S. Mirzaqulovalar ishtirokida tuman hududida joylashgan “Dehqon, oziq-ovqat bozori” MCHJ faoliyati o‘rganildi. O‘rganish jarayonida bozorda sotilayotgan oziq-ovqat mahsulotlarining sanitariya-gigiyena talablariga muvofiqligi, saqlash shart-sharoitlari, mahsulot sifati hamda narxlar shakllanishi masalalari atroflicha ko‘rib chiqildi. Shuningdek, savdo jarayonida qonunbuzilish holatlariga yo‘l qo‘yilmasligi, iste’molchilar huquqlarining himoya qilinishiga alohida e’tibor qaratildi. Nazorat tadbirlari yakunida “Dehqon, oziq-ovqat bozori” MCHJ sanitariya vrachi F.Xudoyberdiyevaga aniqlangan kamchiliklarni bartaraf etish, sanitariya qoidalariga qat’iy rioya qilish, mahsulot sifati ustidan doimiy nazoratni kuchaytirish bo‘yicha tegishli tavsiyalar berildi. Deputatlar tomonidan kelgusida ham bunday nazorat tadbirlari muntazam ravishda o‘tkazilib, aholi salomatligi va manfaatlarini
himoya qilish ustuvor vazifa etib belgilanishi ta’kidlandi.