Hududlarda obodonlashtirish va sanitariya talablariga rioya etilishini ta’minlash, mavjud kamchiliklarni aniqlash hamda ularni bartaraf etish choralarini ko‘rish — deputatlik nazoratining muhim yo‘nalishlaridan biridir.

Termiz shahar 1-“Temiryo‘lchi” saylov okrugi hududida o‘tkazilgan deputatlik nazorati doirasidagi o‘rganish davomida Uvaysiy ko‘chasida joylashgan “TEMIRYO‘LINFRATUZILMA” AJ “TERMIZ LOKOMOTIV DEPOSI” filiali atrofining obodonlashtirish va sanitariya holati o‘rganildi.

O‘rganish davomida yo‘l yoqasi va unga tutash hududlarda daraxt hamda butalardan to‘kilgan barglar to‘planib qolganligi, shuningdek, begona o‘tlar o‘sib, hudud tartibsiz holga kelganligi aniqlandi.

Mazkur holat hududning sanitariya-obodonlashtirish holati va tashqi ko‘rinishiga salbiy ta’sir ko‘rsatmoqda.

Aniqlangan kamchiliklarni bartaraf etish maqsadida xalq deputatlari Termiz shahar Kengashining 1-“Temiryo‘lchi” saylov okrugi deputati Fayzullayev Xikmat Boboqulovich tomonidan “TEMIRYO‘LINFRATUZILMA” AJ “TERMIZ LOKOMOTIV DEPOSI” filiali rahbari S.Ubaydullayevga deputat so‘rovi yuborildi.

Deputat so‘rovida:

Uvaysiy ko‘chasida filialga tutash yo‘l yoqasi va hududda to‘planib qolgan to‘kilgan barglarni to‘liq tozalash;

o‘sib ketgan begona o‘tlarni o‘rib, yo‘l yoqasi va unga tutash maydonlarni obodonlashtirish;

hududdagi daraxt va butalarni belgilangan tartibda parvarishlash;

yo‘l yoqasining sanitariya va obodonlashtirish holatini yaxshilash;

kelgusida hududning doimiy ravishda toza va obod saqlanishini ta’minlash hamda aniqlangan kamchiliklarning takrorlanishiga yo‘l qo‘ymaslik;

amalga oshirilgan ishlar va ko‘rilgan choralar yuzasidan yozma ma’lumot taqdim etish so‘raldi.

Deputatlik nazorati — hududdagi muammolarni aniqlash bilan birga, ularning amaliy yechimini ta’minlashga qaratilgan.

Obod hudud — toza muhit va aholi uchun qulay sharoit garovi.