#Tadbir

 Ayni kunda “Zo‘ravonlikka qarshi 16 kunlik harakat” xalqaro aksiyasi barcha joyda boʻlgani kabi Toshkent viloyatida ham davom etmoqda.  

Xususan, Xalq deputatlari Toshkent viloyati Kengashi deputati Gulnora Ahmedovaning amaliy koʻmagida Qibray tumanida joylashgan "Toshkent IES" AJda ana shunday tadbirlardan biri oʻtkazildi.

Unda “Garmoniya” markazining Oliy Majlis Jamoat Fondi tomonidan moliyaviy qo‘llab-quvvatlangan “Xotin-qizlar va bolalar uchun xavfsiz muhit yaratish” loyihasi doirasida seminar-trening tashkil etildi.

Treningda ishtirokchilar shaxsiy chegaralar, teng munosabatlar madaniyati, samarali muloqot, stressni boshqarish va hayotiy ko‘nikmalarni rivojlantirish bo‘yicha amaliy bilim va tavsiyalar oldilar.

Huquqshunoslar zo‘ravonlik holatlarida murojaat qilish tartibi, huquq va majburiyatlar, davlat tomonidan ko‘rsatiladigan himoya choralari haqida muhim ma’lumotlar taqdim etishdi.

Mashg‘ulotlar davomida ayollar faol ishtirok etib, o‘z tajribalari bilan o‘rtoqlashdi.