O‘zbekiston Respublikasi Prezidentining 2025-yil 29-avgustdagi PQ-264-son hamda 2026-yil 29-iyundagi PQ-243-son qarorlariga asosan 2026-yil ikkinchi bosqich “Tashabbusli byudjet” jarayoni doirasida aholi tomonidan eng ko‘p ovoz to‘plagan, biroq g‘olib deb topilmagan loyihalar bo‘yicha Xalq deputatlari Bo‘stonliq tumani Kengashi raisi O.Babayev, Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiya a’zosi M.Ashurov, kotibiyat mudiri J.Sadirov, O‘zbekiston Respublikasi Qonunchilik palatasi deputati M.Xodjayeva tomonlaridan muhokama yig‘ilishi o‘tkazildi.

🔺Yig‘ilish davomida mazkur loyihalarning mazmun-mohiyati, aholi uchun ijtimoiy ahamiyati va qamrovi atroflicha ko‘rib chiqildi. Ayniqsa, fuqarolar tomonidan qo‘llab-quvvatlangan, biroq yetarli ovoz ololmasdan g‘oliblar qatoriga kiritilmagan loyihalarga alohida e’tibor qaratildi.

🔺Muhokamalarda ushbu loyihalarning aksariyati aholining kundalik hayoti bilan bevosita bog‘liq bo‘lgan muhim masalalarni hal etishga qaratilgani, jumladan, ichki yo‘llarni ta’mirlash, obodonlashtirish, ijtimoiy infratuzilmani yaxshilash kabi yo‘nalishlarda aholi ehtiyojlarini qondirishga xizmat qilishi ta’kidlandi.

🔺Muhokama yakunida saylovchilarning bildirgan taklif va talablari, loyihalarga berilgan ovozlar soni hamda ularning aholi uchun ijtimoiy ahamiyati inobatga olingan holda, eng ko‘p ovoz to‘plagan, ammo g‘olib deb topilmagan ayrim loyihalarni qo‘shimcha ravishda g‘olib deb topish va ularni amalga oshirish imkoniyatini ko‘rib chiqish yuzasidan takliflar shakllantirildi.

🔺Mazkur takliflar qonunchilik tashabbuslari va hududlardagi saylovchilar manfaatlarini ifoda etish nuqtai nazaridan O‘zbekiston Respublikasi Oliy Majlisi Qonunchilik palatasi deputatiga ko‘rib chiqish uchun taqdim etildi.