Tuman Kengashi deputati Q. Alimov:
Energiya tejamkorligi – bugunning eng muhim talabi

✅ O‘zbekiston Respublikasining 2024-yil 7-avgustda qabul qilingan “Energiyani tejash, undan oqilona foydalanish va energiya samaradorligini oshirish to‘g‘risida”gi O‘RQ-940-son Qonuni mamlakatimizda yoqilg‘i-energetika resurslaridan samarali foydalanish, energiya isrofgarchiligini kamaytirish hamda zamonaviy energiya tejamkor texnologiyalarni keng joriy etishga xizmat qiladi.

✅ Mazkur Qonunga muvofiq, energiyani tejash sohasida yagona davlat siyosati amalga oshiriladi, energiya resurslarini iste'mol qilish normalari takomillashtiriladi hamda energiya samaradorligini oshirish bo‘yicha davlat dasturlari izchil amalga oshiriladi. Bu boradagi maxsus vakolatli davlat organi sifatida Energetika vazirligi faoliyat yuritadi, davlat nazorati esa O‘zenergoinspeksiya tomonidan amalga oshiriladi.

✅ Tuman Kengashi deputati sifatida har bir fuqaro, korxona va tashkilotni elektr energiyasi, tabiiy gaz hamda boshqa energiya resurslaridan oqilona foydalanishga chaqiraman. Uy-joylarda energiya tejamkor chiroqlardan foydalanish, issiqlik yo‘qotilishini kamaytirish, zamonaviy energiya samarador uskunalarni joriy etish nafaqat xarajatlarni qisqartiradi, balki atrof-muhitni asrashga ham xizmat qiladi.

✅ Bugungi kunda energiyani tejash – bu shunchaki iqtisod qilish emas, balki kelajak avlodlar manfaatini ko‘zlab tabiiy resurslardan oqilona foydalanish demakdir. Shu bois, har birimiz ushbu Qonun talablariga amal qilib, energiya samaradorligini oshirishga o‘z hissamizni qo‘shishimiz zarur.