Xalq deputatlari Qo‘qon shahar Kengashi raisi va deputati Yu.To‘ychiyev tomonidan fuqarolar murojaatlari asosida navbatdagi deputatlik so‘rovi yuborildi.

Deputatning "Chorchinor" mahalla fuqarolar yig‘inida saylovchilar bilan o‘tkazgan uchrashuvlari hamda joyiga chiqib olib borgan o‘rganishlari davomida aholi tomonidan Saxovat ko‘chasini tungi yoritish jihozlari bilan ta’minlash masalasida murojaat bildirildi.

O‘rganish jarayonida mazkur ko‘chada yetarli yoritish tizimining mavjud emasligi fuqarolar, ayniqsa piyodalar va transport vositalari harakati xavfsizligiga salbiy ta’sir ko‘rsatayotgani, tungi vaqtda noqulayliklar yuzaga kelayotgani qayd etildi.

Mazkur murojaat yuzasidan O‘zbekiston Respublikasining “Xalq deputatlari viloyat, tuman va shahar Kengashi deputatining maqomi to‘g‘risida”gi Qonuni talablariga muvofiq, Qo‘qon shahar hokimining qurilish, to‘siqsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari nomiga deputatlik so‘rovi yuborildi.

Deputatlik so‘rovida Saxovat ko‘chasini tungi yoritish jihozlari bilan ta’minlash bo‘yicha ko‘rilayotgan chora-tadbirlar, ushbu ishlarni amalga oshirish muddatlari hamda rejalashtirilgan ishlar yuzasidan asoslantirilgan yozma ma’lumot taqdim etish so‘ralgan.

Mazkur masala deputat nazoratiga olingan bo‘lib, uning ijrosi yuzasidan amalga oshirilayotgan ishlar va erishilgan natijalar haqida jamoatchilikka qo‘shimcha ma’lumotlar berib boriladi.

Xalq deputatlari Qo‘qon shahar Kengashi