Bozataw rayonı "Erkindarya" APJ aymaǵında Xalıq deputatları rayonlıq Keńesinen 8-sanlı «Erkindarya » saylaw okruginen (ÓzLiDeP) saylanǵan deputat J.Jumanazarov “Erkindarya” APJ aymaǵındaǵı 28-sanlı shańaraq poliklinikasında bolıp xalıqqa óz waqtında sıpatlı medicinalıq járdem kórsetiliw jaǵdayın úyrenip olarda ushırasıp atırǵan mashqalalar menen jaqınan tanıstı.
Keyingi jıllarda Mámleketimizde hár bir puqara ushın joqarı sapalı hám qánigeli medicinalıq xızmet sistemasın jaratıw áhmiyetli wazıypa sıpatında belgilenip, bul baǵdarda keń kólemli reformalar ámelge asırılıp atırǵanı hámmemizge jaqsı belgili.
Úyreniw dawamında medicina mákemesiniń materiallıq-texnikalıq bazası, xalıqqa kórsetilip atırǵan medicinalıq xızmetlerdiń sapası, dári-dármaq támiynatı hám shıpaker hám medicina xızmetkerleri ushın jaratılǵan sharayatlar menen jaqınnan tanıstı.
Sonday-aq, shańaraq poliklinikasına múrájat etip kiyatırǵan puqaralar menen sáwbet ótkerilip, olardıń pikir-usınısları tıńlandı. Mákemede anıqlanǵan ayırım kemshiliklerdi saplastırıw hám medicinalıq xızmet sapasın bunnan bılay da jaqsılaw boyınsha tiyisli juwapkerlerge usınıslar berildi.
Xalıqtıń salamatlıǵın qorǵaw, medicinalıq xızmetlerdiń sapasın arttırıw hám tarawdaǵı mashqalalardı sheshiw máseleleri turaqlı deputatlıq qadaǵalawda bolatuǵını atap ótildi.