Xalq deputatlari Qo‘qon shahar Kengashi deputati Sh.Dehqonov aholiga tibbiy xizmat ko‘rsatish sifatini oshirish, tibbiyot maskanlaridagi sharoitlarni yaxshilash va sog‘liqni saqlash tizimidagi islohotlarning ijrosini ko‘zdan kechirish maqsadida shahardagi 1-sonli oilaviy poliklinikada bo‘ldi.

Deputat tomonidan o‘tkazilgan tizimli o‘rganish davomida aholi salomatligi uchun eng muhim bo‘lgan quyidagi jihatlarga alohida e’tibor qaratildi:

bepul ta’minot: Davlat tomonidan ajratilayotgan va birlamchi tibbiy yordam uchun eng zarur bo‘lgan 24 turdagi bepul dori-darmon vositalarining poliklinikada to‘liq mavjudligi;

Saqlash sharoitlari: Dori-darmonlarning sifati yo‘qolmasligi uchun tibbiy me’yorlar va maxsus harorat qoidalariga mos ravishda, xavfsiz saqlanishi;

Manzilli taqsimot: Ijtimoiy himoyaga muhtoj qatlam, surunkali kasalligi bor bemorlar hamda dispanser nazoratida turgan fuqarolarning dori vositalari bilan o‘z vaqtida va bepul ta’minlanish jarayoni.

O‘rganish davomida Sh.Dehqonov poliklinikaning mas’ul tibbiyot xodimlari va shifokorlari bilan suhbatlashdi. Muloqotda bepul dori-darmonlar taqsimotining ochiqligi va shaffofligini ta’minlash, aholining tibbiy madaniyatini yuksaltirish hamda mahallabay ishlash tizimi orqali har bir bemorga individual yondashish zarurligi ta’kidlandi. Shahar aholisiga birlamchi tibbiy-sanitariya yordami ko‘rsatish sifatini yanada yaxshilash bo‘yicha mas’ullarga tegishli tavsiya va takliflar bildirildi.

Qo‘qon shahri aholisi salomatligini muhofaza qilish va tibbiy xizmat ko‘rsatish sifatini nazorat qilish deputatlik faoliyatining bosh mezonidir.

Xalq deputatlari Qo‘qon shahar Kengashi