Fuqarolar murojaatlari amaliy yechim topmoqda

🇺🇿 Xalq deputatlari Uchtepa tumani Kengashi kotibiyati hamda Uchtepa tumani “Inson” ijtimoiy xizmatlar markazi hamkorligida navbatdagi fuqarolar qabuli tumandagi “Bog‘obod” mahalla fuqarolar yig‘ini binosida tashkil etildi.

➕ Qabul davomida fuqarolar tomonidan tibbiy yordam, ijtimoiy qo‘llab-quvvatlash hamda davolanish bilan bog‘liq murojaatlar ko‘rib chiqildi. Tadbirda mutasaddi tashkilot rahbarlari bilan bir qatorda tuman “Madad” NNT vakili Sayfulla Mahmudov, tuman Kengashi kotibiyati mudiri Anvar Usmanov hamda tuman Kengashi kotibiyati bosh mutaxassisi Zarnigor Kuziyevalar ham ishtirok etdi.

👁 Jumladan, 15-26-19-uyda istiqomat qiluvchi fuqaro Sh.Zubaydova koksartroz kasalligi sababli ikki marotaba jarrohlik amaliyotini boshdan kechirganini, shuningdek chap tomon suyak yemirilishi hamda qandli diabet kasalligi bilan og‘riyotganini ma’lum qildi. Fuqaroning tibbiy hujjatlari bilan tanishgan tuman tibbiyot birlashmasi rahbari Ulug‘bek Karabayev ushbu fuqaroni MISS loyihasi orqali dasturga kiritish zarurligini bildirib, shu asosda Respublika ortopediya va travmatologiya markazida jarrohlik amaliyotini o‘tkazish imkoniyati mavjudligini ta’kidladi.

📁 Shuningdek, 15-16V-18-uyda yashovchi fuqaro Abidova Zulayho farzandi BSF kasalligi bilan xastalanganini hamda unga maxsus nogironlik aravachasi zarurligini bildirdi. Mazkur murojaat yuzasidan Uchtepa tumani “Inson” ijtimoiy xizmatlar markazi direktori G‘ulom Eshatov tomonidan fuqaro ehtiyoj bildirgan nogironlik aravachasi bo‘yicha aniqlik kiritilib, mahalladagi ijtimoiy xodim orqali tegishli ariza rasmiylashtirilishini ma’lum qildi. Ushbu masala nazoratga olindi.

✨ Qabul davomida fuqaro Qodir Bilolov ham ishtirok etib, ko‘z jarrohlik amaliyoti bo‘yicha murojaat qildi. Mutasaddilar tomonidan fuqaroni 25-oilaviy poliklinika bosh shifokori bilan bog‘lagan holda, barcha tibbiy hujjatlarni tizim orqali kiritish lozimligi tushuntirildi.

🔼 Ta’kidlash joizki, xalq deputatlari Uchtepa tumani Kengashi kotibiyati hamda tuman “Inson” ijtimoiy xizmatlar markazi hamkorligida tashkil etilayotgan bunday qabullar fuqarolarning muammolarini joyida o‘rganish, ularga amaliy yordam ko‘rsatish hamda ijtimoiy himoyani kuchaytirishda muhim ahamiyat kasb etmoqda.

💬 Eng muhimi, murojaatlar shunchaki tinglanib qolmasdan, ularni hal etish bo‘yicha aniq tashkilotlar va mas’ullar biriktirilayotgani fuqarolarning davlat idoralariga bo‘lgan ishonchini mustahkamlashga xizmat qilmoqda.