NAVOIY SHAHRIDA FXDYO ORGANLARI FAOLIYATI O‘RGANILDI

Xalq deputatlari Navoiy shahar Kengashi deputati Irgasheva Nilufar Uralovna xizmat safari bilan Toshkent shahrida bo‘lganligi munosabati bilan, belgilangan haftalik ish rejasiga asosan Navoiy shahar FXDYO organlarida fuqarolarga xizmat ko‘rsatilishi holati o‘rganildi. Mazkur o‘rganish Kotibiyat bosh mutaxassisi Muborak Astanova tomonidan olib borildi.

O‘rganish jarayonida aholiga ko‘rsatilayotgan xizmatlar sifati, murojaatlar bilan ishlash tizimi, fuqarolar uchun yaratilgan qulayliklar hamda xizmat ko‘rsatish jarayonlarining samaradorligi tahlil qilindi. Shuningdek, fuqarolik holati dalolatnomalarini rasmiylashtirish bo‘yicha statistik ko‘rsatkichlar ham atroflicha ko‘rib chiqildi.

Ma’lumotlarga ko‘ra, 2025 yil davomida tug‘ilishlar soni 4840 nafarni tashkil etgan bo‘lsa, 2026 yilning bugungi kun holatiga 1526 nafar tug‘ilish qayd etilgan. Nikohlar soni 2025 yilda 1911 tani tashkil etgan bo‘lsa, joriy yilning hozirgi davriga kelib 318 ta nikoh ro‘yxatga olingan.

Ajrimlar statistikasi tahliliga ko‘ra, 2025 yilda 345 ta ajrim qayd etilgan bo‘lsa, 2026 yilning bugungi kun holatiga 117 ta ajrim rasmiylashtirilgan. Shu bilan birga, o‘lim holatlari 2025 yilda 840 tani tashkil etgan bo‘lsa, 2026 yil davomida hozirga qadar 264 ta holat qayd etilgan.

O‘rganish natijalari shuni ko‘rsatdiki, Navoiy shahar Davlat xizmatlari markazi hamda FXDYO organlarida aholiga xizmat ko‘rsatish tizimi izchil takomillashib bormoqda. Fuqarolarga qulay shart-sharoitlar yaratish, xizmatlar tezligi va shaffofligini oshirish borasida muayyan ishlar amalga oshirilmoqda.

Shu bilan birga, xizmat ko‘rsatish sifatini yanada yaxshilash, raqamlashtirish jarayonlarini kengaytirish hamda murojaatlar bilan ishlash samaradorligini oshirish yuzasidan tegishli tavsiyalar ishlab chiqildi. Kelgusida ushbu yo‘nalishda amalga oshirilayotgan ishlar ustidan doimiy nazorat o‘rnatish muhim vazifalardan biri bo‘lib qoladi.