Deputat tashabbusi: Mevazor mahallasidagi elektr ta’minoti muammosi hal etildi

Xalq deputatlari tuman Kengashi deputatlarining aholi muammolariga bo‘lgan e’tibori va ularning yuqori turuvchi organlar bilan hamjihatlikda ishlashi o‘zining ijobiy natijalarini bermoqda.

20-Baxmal saylov okrugi deputati Jamol Ergashevga "Mevazor" mahallasi, Zakovat ko‘chasi aholisi tomonidan muhim murojaat kelib tushgan edi. Fuqarolar hududdagi katta quvvatli elektr uzatish tarmoqlarida texnik nuqsonlar borligi, bu esa inson hayoti uchun xavf tug‘dirayotganidan xavotir bildirgan edilar.

Yechim sari qadam

Mazkur masala deputat J. Ergashev tomonidan nazoratga olindi va joriy yilning 23-aprel kuni Do‘stlik tumanida o‘tkazilgan tuman va viloyat Kengashi deputatlarining sayyor qabulida o‘rtaga tashlandi.

Amaliy hamkorlik: Murojaat bevosita viloyat Kengashi deputatlariga yetkazildi. Viloyat Kengashi deputatlarining bevosita tashabbusi va masalaga jiddiy yondashuvi natijasida, qisqa muddat ichida ushbu liniyadagi barcha nosozliklar bartaraf etildi.

Xalq roziligi — eng oliy mukofot

Bugun Zakovat ko‘chasi aholisi xonadonlarida chiroqlar yorug‘, xavfsizlik ta’minlangan. Amalga oshirilgan ushbu xayrli ishdan mamnun bo‘lgan Mevazorliklar deputatlarning ko‘rsatgan jonbozligi uchun o‘z minnatdorchiliklarini izhor qilib, maxsus tashakkurnoma yo‘llashdi.