Xalq deputatlari Parkent tuman Kengashiga 15-Beshkappa saylov okrugidan saylangan deputat Berdiqulova Mavluda Tojiddinovna o‘zi saylangan hudud — “Oybek” mahallasida bo‘lib, mahalladagi “Mahalla yettiligi”
faoliyati bilan yaqindan tanishdi. O‘rganish jarayonida mahalladagi yoshlar yetakchisining 9 ta asosiy yo‘nalish bo‘yicha olib borayotgan faoliyati atroflicha tahlil qilindi. Ayniqsa, yoshlar bandligini ta’minlash, ularni kasb-hunarga yo‘naltirish hamda ijtimoiy qo‘llab-quvvatlash borasida amalga oshirilayotgan ishlar alohida e’tibor markazida bo‘ldi. Shuningdek, mahalladagi qizil toifaga kiritilgan va deputat Mavluda Berdiqulovaga biriktirilgan yoshlar bilan olib borilgan manzilli ishlar natijasida ijobiy o‘zgarishlarga erishilgani qayd etildi. Xususan, yil boshida qizil toifada bo‘lgan 3 nafar yosh bugungi kunda ushbu toifadan chiqarilgan. Bu esa hududda yoshlar bilan ishlash tizimi samarali yo‘lga qo‘yilganini hamda amaliy ishlar izchil davom etayotganini ko‘rsatadi. Shu bilan birga, boshqa yo‘nalishlar kesimida ham mavjud ishlar muhokama qilinib, faoliyat
samaradorligini yanada oshirish, aniqlangan kamchilik va muammolarni bartaraf etish, yoshlarning ijtimoiy-iqtisodiy manfaatlarini to‘liq ta’minlash yuzasidan tegishli tavsiya va ko‘rsatmalar berildi.