“Chinor” mahallasida xotin-qizlarni qo‘llab-quvvatlash borasida olib borilgan ishlar o‘rganildi

Xalq deputatlari Navoiy shahar Kengashi deputati Raxmatova Muqaddas Bekpulatovna xizmat safari bilan Toshkent shahrida bo‘lganligi munosabati bilan, belgilangan haftalik ish rejaga asosan Navoiy shahar “Chinor” mahalla fuqarolar yig‘inida xotin-qizlar bilan ishlash yo‘nalishida amalga oshirilayotgan ishlar holati o‘rganildi. Ushbu o‘rganish Kotibiyat bosh mutaxassisi Muborak Astanova tomonidan olib borildi.

Mahallada xotin-qizlarni qo‘llab-quvvatlash, ularning ijtimoiy muammolarini bartaraf etish va bandligini ta’minlashga qaratilgan chora-tadbirlar izchil amalga oshirilayotgani kuzatildi. Xususan, 2026-yil davomida “Ayollar daftari” orqali ijtimoiy himoyaga muhtoj xotin-qizlarni aniqlash va ularga manzilli yordam ko‘rsatish ishlari tizimli yo‘lga qo‘yilgani aniqlandi.

O‘rganishlar natijasiga ko‘ra, 2026-yilda “Ayollar daftari”ga jami 80 nafar xotin-qizlar kiritilgan bo‘lib, ular turli toifalar bo‘yicha qamrab olingan. Jumladan, ishsiz, mehnat qilish istagida bo‘lgan, biroq doimiy ish joyiga ega bo‘lmagan 15 nafar xotin-qizning bandligini ta’minlash bo‘yicha amaliy choralar ko‘rilmoqda. Shu bilan birga, tadbirkorlik qilish istagida bo‘lgan hamda kredit va boshqa moliyaviy resurslarga ehtiyojmand xotin-qizlar toifasi bo‘yicha o‘rganishlar natijasida hozircha muhtojlik aniqlanmagani qayd etildi.

Mahallada uy-joy sharoitini yaxshilashga muhtoj bo‘lgan xotin-qizlar bilan ham manzilli ishlar amalga oshirilmoqda. Ijarada yashovchi jami 2 nafar hamda uy-joyi ta’mirtalab holatda bo‘lgan 1 nafar xotin-qizlarning uy-joyini ta’mirlash ishlari belgilangani bu boradagi amaliy yordamning yorqin namunasi hisoblanadi.

Shuningdek, tibbiy, ijtimoiy va psixologik qo‘llab-quvvatlashga muhtoj bo‘lgan 10 nafar xotin-qizlar bilan mutasaddi tashkilotlar hamkorligida tegishli ishlar olib borilmoqda. Ayni paytda, huquqiy himoyaga muhtoj bo‘lgan 52 nafar xotin-qizga huquqiy maslahat va amaliy ko‘mak ko‘rsatish choralari belgilangan.

 “Chinor” mahallasida xotin-qizlar bilan ishlash tizimi izchil tashkil etilgan bo‘lib, ularni ijtimoiy qo‘llab-quvvatlash, muammolarini o‘z vaqtida hal etish va jamiyatdagi faolligini oshirishga alohida e’tibor qaratilmoqda. Shu bilan birga, kelgusida xotin-qizlarni tadbirkorlikka keng jalb qilish, ularning daromad manbalarini ko‘paytirish va bandligini ta’minlash bo‘yicha ishlarni yanada kuchaytirish zarurligi ta’kidlandi.