Bugun Samarqand yana bir bor jahon e’tiborida. 25–26 avgust kunlari yurtimizda Iordaniya Podshohi Abdulla II ibn al-Husaynning davlat tashrifi bo‘lib o‘tmoqda. Oliy darajadagi ushbu sammit O‘zbekistonning jahon maydonidagi tobora ortib borayotgan nufuzidan dalolat beradi.

Samarqand qadimdan sivilizatsiyalar chorrahasi, savdo va diplomatiya markazi bo‘lib kelgan. Bugun esa bu shahar zamonaviy xalqaro siyosiy muloqotlar, iqtisodiy kelishuvlar va madaniy aloqalar maydoniga aylanmoqda.

Sammit doirasida siyosiy, savdo-iqtisodiy va investitsiyaviy hamkorlik masalalari muhokama qilinishi mamlakatimiz taraqqiyoti uchun ulkan imkoniyatlarni yaratadi. Iordaniya kabi muhim hamkor bilan yangi loyihalar amalga oshirilishi O‘zbekiston iqtisodiyoti, xususan, investitsiya va innovatsiya sohalarida yangi ufqlar ochishi shubhasiz.

Eng muhimi, bu kabi uchrashuvlar davlatlararo do‘stlik va ishonchni mustahkamlaydi. Shu orqali xalqimiz uchun yangi ish o‘rinlari, sifatli xizmatlar, zamonaviy texnologiyalar va qulay imkoniyatlar eshigi ochiladi.

Prezidentimizning tashabbuslari tufayli bugun O‘zbekiston Markaziy Osiyodagi emas, balki butun dunyo miqyosida ham ochiq, do‘stona va ishonchli hamkor sifatida tanilmoqda.

Demak, Samarqanddagi ushbu sammit – nafaqat siyosiy voqea, balki xalqimiz hayotiga bevosita ta’sir qiluvchi, kelajakka ishonch va taraqqiyot olib keluvchi tarixiy qadamdir.

Xalq deputatlari Payariq tumani kengashi deputati N.Parmanova.