"Gúlistan" MPJda xalıqaralıq investiciya esabınan jańa obъekt boy tiklemekte

✅ Xalıq deputatları Shımbay rayonlıq Keńesi deputatı, Ózbekstan XDP deputatlıq toparı aǵzası X.Abdijaliev ózi saylanǵan "Gúlistan" MPJ aymaǵında ámelge asırılıp atırǵan qurılıs jumısları menen jaqınnan tanıstı.

Ámeliy ilaj dawamında deputat "Gúlistan" MPJ aymaǵında qurılıp atırǵan rayonlıq Sanitariya-эpidemiologiyalıq tınıshlıq hám jámiyet salamatlıǵı bóliminiń jańa imaratınıń qurılıs procesin tikkeley orınǵa shıqqan halda úyrendi.

Bul áhmiyetli sociallıq joybar Birlesken Milletler Shólkeminiń Joybarlaw xızmetleri basqarması (UNOPS) xalıqaralıq shólkeminiń grant hám investiciya qarjıları esabınan ámelge asırılmaqta. Joybardı qarjılandırıw ushın 967 mıń AQSh dolları ajıratılǵan bolıp, házirgi waqıtta qurılıs-montajlaw jumısları belgilengen reje hám kestege tolıq muwapıq halda jedel alıp barılmaqta.
Bolajaq zamanagóy obъektte zamanagóy injenerlik-kommunikaciya hám alьternativ эnergiya tarmaqları, xalıq hám xızmetkerler ushın barlıq qolaylıqlarǵa iye xızmet bólmeleri, joqarı anıqlıqta diagnoz qoyıw imkaniyatın beretuǵın innovaciyalıq laboratoriyalar jáne miynet hám qáwipsizlik talaplarına tolıq juwap beretuǵın bekkem infrastruktura jaratılıwı názerde tutılǵan.

Úyreniw juwmaqları boyınsha qurılıs sapası hám múddetleri ústinen turaqlı deputatlıq qadaǵalaw ornatılatuǵını atap ótildi.