Ózbekstan Respublikası Prezidentiniń Pármanı tiykarında Jizzaq wálayatı Taxtakópir rayonına biriktirilgen bolıp, Xalıq deputatları Jizzaq wálayatlıq hám rayonlıq, qalalıq Keńesleri deputatlarınan ibarat delegaciya óz-ara tájiriybe almasıw maqsetinde Qaraqalpaqstan Respublikasında bolǵan edi.
Usı aymaqlararalıq birge islesiw sheńberinde Jizzaq wálayatınan mámleketlik shólkemler hám mámleketlik emes kommerciyalıq emes shólkemlerdiń wákillerinen ibarat delegaciya búgin Qaraqalpaqstan Respublikasına bardı.
Sapar sheńberinde Taxtakópir rayonındaǵı 2-sanlı mektepte "Jawızlıqqa qarsı aǵartıwshılıq" atamasında ruwxıy-aǵartıwshılıq ilaj shólkemlestirildi.
Onda Jizzaq wálayatı deputatı hám Ekologiyalıq partiya baslıǵı Akram Raxmanqulov, Ekologiyalıq partiyası Taxtakópir rayonlıq Keńesiniń baslıǵı B.Baymbetova, rayonlıq Keńes sekretariatı baslıǵı T.Jusipov, mektep direktorı G.Zarlikova, pedagoglar hám joqarı klass oqıwshıları qatnastı.
Ushırasıw dawamında jaslardı jaqsılıq, adamgershilik hám keńpeyillik ruwxında tárbiyalaw, olardıń ruwxıy dúnyaqarasın joqarılatıw, hár qıylı unamsız illetlerge qarsı aǵartıwshılıq penen gúresiw jáne jaslar arasında salamat ruwxıy ortalıqtı qáliplestiriw máselelerine ayrıqsha itibar qaratıldı.

Bul ilaj aymaqlararalıq birge islesiwdi bekkemlew, aldınǵı tájiriybelerdi ǵalaba en jaydırıw hám jas áwladtı bárkamal insanlar etip tárbiyalaw jolındaǵı áhmiyetli qádemlerden biri boldı.