Xalıq deputatları Bozataw rayonlıq Keńesiniń Korrupciyaǵa qarsı gúresiw, sociallıq taraw, jaslar siyasatı, mádeniyat hám sport máseleleri boyınsha turaqlı komissiyasınıń gezektegi májilisi komissiya aǵzaları, tiyisli mákemelerdiń basshıları hám juwapker qánigeleriniń qatnasıwında ótkerildi.
Májilistiń tiykarǵı maqseti - rayon kóleminde sociallıq tarawlardıń áhmiyetli baǵdarları boyınsha alıp barılıp atırǵan jumıslardı tallaw, ámeldegi mashqalalardı anıqlaw, olardı sheshiw boyınsha usınıslar islep shıǵıw hám jergilikli atqarıwshı uyımlardıń jumısın deputatlıq baqlaw sheńberinde úyreniwden ibarat boldı.

Kún tártibinde eki másele kórip shıǵıldı:
Birinshi másele boyınsha: Ózbekstan Respublikası Prezidentiniń Bozataw rayonlıq Xalıq qabıllawxanası arqalı 2026-jıldıń birinshi yarım jıllıǵında kelip túsken puqaralardıń múrájatları, olardıń mazmunı, múrájatlardı óz waqtında hám sapalı kórip shıǵıw jaǵdayı, sonıń menen birge xalıqtı qıynap atırǵan mashqalalardı saplastırıw boyınsha ámelge asırılǵan ilajlar haqqında tiyisli juwapkerlerdiń esabatı tıńlandı.
Dodalaw dawamında deputatlar tárepinen múrájatlardı qayta-qayta kelip túsiwine sebep bolıp atırǵan faktorlar, olardıń aldın alıw mexanizmlerin jetilistiriw, puqaralar menen tikkeley baylanıstı kúsheytiw, kóshpeli qabıllawlardı jıynaw hám hár bir múrájat boyınsha nátiyjeli jumıs alıp barıw boyınsha bir qatar usınıslar bildirildi.

Ekinshi másele boyınsha: Bozataw rayonı Medicina birlespesi tárepinen 2026-jıldıń 6 ayı dawamında xalıqqa kórsetilgen medicinalıq xızmettiń sapası hám qamtıp alıw dárejesi, birinshi medicinalıq járdemdi shólkemlestiriw, ana hám bala salamatlıǵın qorǵaw, profilaktikalıq tekseriwlerdi ótkeriw, dáriler menen támiyinlew, sanitariyalıq-epidemiologiyalıq jaǵday hám salamatlıqtı saqlaw tarawında ámelge asırılǵan jumıslar haqqında esabat tıńlandı.
Komissiya aǵzaları medicinalıq xızmet sapasın bunnan bılay da jaqsılaw, medicinalıq punktlerdiń materiallıq-texnikalıq bazasın bekkemlew, xalıqtı sapalı medicinalıq xızmet penen qamtıp alıw, puqaralardıń múrájatlarına itibarlı qaraw hám densawlıqtı saqlaw tarawındaǵı mashqalalardı waqtında sheshiw boyınsha óz pikir-usınısların bildirdi.

Sóylesiw juwmaǵında kún tártibindegi hár eki másele boyınsha tiyisli shólkemlerge anıq usınıslar hám tapsırmalar berildi. Turaqlı komissiya tárepinen qabıl etilgen usınıslardıń orınlanıwın deputatlıq qadaǵalawǵa alıw haqqında tiyisli qararlar qabıl etildi.

Xalıq deputatları Bozataw rayonlıq Keńesiniń turaqlı komissiyaları bunnan keyin de rayon turǵınlarınıń turmıs sapasın jaqsılawǵa qaratılǵan máselelerdi úzliksiz deputatlıq baqlaw astında alıp baradı.