🌿 Bandixon tumanida xotin-qizlarni kasb-hunarga yo‘naltirish ishlari o‘rganildi

Xalq deputatlari Bandixon tuman Kengashi kotibiyati mudiri A.Pardayev hamda tuman hokimi o‘rinbosari U. Qulmamatov tomonidan "Paxtakor" mahallasida xotin-qizlarni kasb-hunarga yo‘naltirish bo‘yicha berilgan tavsiyalar ijrosi o‘rganildi.

O‘rganish davomida xotin-qizlarning bandligini ta’minlash, kasb-hunarga o‘qitish, oilaviy tadbirkorlikni rivojlantirish hamda ularning ijtimoiy faolligini oshirish borasida amalga oshirilayotgan ishlar tahlil qilindi.

Shuningdek, deputatlarga biriktirilgan qonunlar ijrosi doirasida ishlab chiqilgan savolnomalar asosida O‘zbekiston Respublikasining “Oilaviy tadbirkorlik to‘g‘risida”gi Qonuni ijrosi yuzasidan amaliy o‘rganish ishlari olib borildi. Mazkur qonun oilaviy tadbirkorlikni rivojlantirish, aholi bandligini ta’minlash, xotin-qizlarning iqtisodiy faolligini qo‘llab-quvvatlash hamda ularning barqaror daromad manbaiga ega bo‘lishi uchun huquqiy asos bo‘lib xizmat qiladi.

Xususan, mahallada xotin-qizlar uchun zamonaviy tikuvchilik xonasi tashkil etilgani, zarur tikuv mashinalari va jihozlari bilan ta’minlangani hamda qulay mehnat sharoitlari yaratilgani e’tirof etildi. Bu esa xotin-qizlarning kasb egallashi, amaliy ko‘nikmalarini rivojlantirishi va oilaviy tadbirkorlik faoliyatini yo‘lga qo‘yishiga keng imkoniyat yaratmoqda.

Mazkur tashabbuslar O‘zbekiston Respublikasi qonunchiligida belgilangan xotin-qizlarning mehnat qilish, tadbirkorlik bilan shug‘ullanish va iqtisodiy faolligini qo‘llab-quvvatlashga oid ustuvor vazifalar ijrosini ta’minlashga xizmat qilmoqda.

O‘rganish yakunida ushbu yo‘nalishdagi ishlarni yanada kengaytirish, qo‘shimcha kasb-hunar o‘quv kurslarini tashkil etish hamda ko‘proq xotin-qizlarni qamrab olish yuzasidan tegishli tavsiya va takliflar berildi.

Qonun ustuvorligi – farovon mahalla va iqtisodiy faol xotin-qizlar sari muhim qadamdir.