Xalq deputatlari Jondor tumani Kengashi deputati R.Bozorova tashabbusi bilan tumandagi 46-umumiy o‘rta ta’lim maktabida o‘quvchilar o‘rtasida shaxmat musobaqasi tashkil etildi.
📌Musobaqadan ko‘zlangan asosiy maqsad yoshlar o‘rtasida intellektual sport turlarini keng targ‘ib qilish, ularning mantiqiy fikrlash qobiliyatini rivojlantirish, bo‘sh vaqtlarini mazmunli tashkil etish hamda iqtidorli o‘quvchilarni qo‘llab-quvvatlashdan iborat bo‘ldi.
📌Bellashuvlar qizg‘in va murosasiz ruhda kechib, ishtirokchilar o‘zlarining bilim, zehn va strategik fikrlash qobiliyatlarini namoyon etdilar. Hakamlar tomonidan har bir o‘yin adolatli baholanib, yuqori natija qayd etgan o‘quvchilar g‘olib deb topildi.
📌Tadbir davomida shaxmat nafaqat sport turi, balki yoshlarda sabr-toqat, intizom, mustaqil qaror qabul qilish va tahliliy fikrlash ko‘nikmalarini shakllantiruvchi muhim vosita ekani alohida ta’kidlandi.
📌Yakunda g‘olib va faol ishtirokchilar tashkilotchilar tomonidan munosib taqdirlandi. Bunday intellektual musobaqalarni muntazam tashkil etish yosh avlodning bilimli, salohiyatli va raqobatbardosh shaxs sifatida kamol topishiga xizmat qilishi qayd etildi.