Jas degende kóz aldımızǵa biyǵubаr,
kókiregi kúshke tolıp, umtılǵan nársesine erisetuǵın, umtılıwshаń, shаqqаn
jigitlerdi,
óziniń iybeliligi, mádeniyatı, biytákirаr sulıwlıǵı menen kózge túsken, sаptа
erler menen teń turıp iskerlik etip
аtırǵаn qızlаrımızdı kóz аldımızǵа keltiremiz. Olаrǵа úlken úmitler menen
qаrаp, keleshegine názer sаlıp járdem beriwge umtılаmız, mаqtаnısh etemiz.
Usı jılı 30-iyun kúni Prezidentimizdiń
elimiz jasları menen ushırasıwı bolıp ótti hám bul ushırasıwda jaslarımızdıń
mámleket rawajlanıwınıń oǵada úlken ekonomikalıq, sociallıq hám siyasiy kúshi
ekenligi ayrıqsha atap ótilgen edi. Bul ushırasıw kóp jaslardıń
turmısında úlken burılıs payda etti. Jaslarımızdıń bilimge degen ıqlası arttı,
sportqa, kásip-ónerge degen itibarı elede kúsheyedi dep oylayman. Men deputat bolǵanlıǵım ushın saylawshılar menen ushırasıw ótkergen waqıtta olardıń bergen soraw, múrájatların, usınısların kórip tásirlenemen hám hárbir
ushırasıw ushın jaslar haqqında, ásirese
Qaraqalpaqstan Respublikası jasları ushın
Prezidentimiz tárepinen shıǵarılıp atırǵan qarar, Pármanlardı qayta-qayta oqıp, Respublikamızda
bul boyınsha qanday isler ámelge asırılıp atırǵanın úyrenip baraman. Álbette,
bul jaslarımızdıń talabı. Bul baǵdarda hár
piyshembi kúniniń "Jaslar kúni" dep belgileniwi hámde lawazımlı shaxslardıń búgingi kúnde piyshembi kúninde turaqlı ushırasıwları ótkerilip,
olar menen tereń pikir alıspaqta.  

 Men de 17-sanlı "Jiyen jıraw" saylaw
okruginen deputat bolǵanım sebepli jaslar menen tez-tezden ushırasıp turaman.
Aymaǵımdaǵı mıńǵa shamalas jaslardıń hárbiri menen ilajı barınsha jaqınlasıwǵa,
pikirlesiwge umtılaman. Aymaǵımızda jas hayal-qızlarımız búgingi kúnge shekem
tigiwshilik, kulinariya boyınsha oqıw kurslarında oqıp, óner iyelegen bolsa,
jas jigitlerimizdi mákeme, shólkemler basshılarına "Ustaz-shákirt"
usılında isbilermen, fermer, jeke diyqan xojalıqlarına biriktirip, olardıń
kásip úyreniwine, bántliginiń támiyinleniwine tiykar salmaqtamız.

Ushırasıwlarımızda jaslarǵa jaratılǵan
sharayatlar, máselen, jaslar isbilermenligin qollap-quwatlawda 200 mln dollar
pul ajıratılatuǵını, "Keleshek isbilermeni" baǵdarlaması tiykarında
jas isbilermenlerge 7 jılǵa 15 procentlik kredit beriletuǵını, isbilermenligin
keńeytpekshi bolǵanlarǵa bolsa 2 milliard sumǵa shekem, pitkeriwshini jumısqa
alǵan isbilermenge 10 milliardqa shekem kredit ajıratılatuǵını, "Meniń
birinshi kásibim" baǵdarlaması tiykarında joqarı oqıw ornın
pitkeriwshilerge ayına 2 million sumǵa shekem stipendiya beriletuǵınlıǵı,
bankler 50 mıń jasqa biznes reje tayarlap beriwi hám 20 mıń jas isbilermenlikke
oqıtılatuǵınlıǵı, texnikum oqıwshıları ushın "Work and travel"
baǵdarlaması arqalı sırtqı ellerde islew imkaniyatı jaratılǵanlıǵı,
"Joqarı oqıw orayları associaciyası" shólkemlestirilip, hárbir
rayonǵa 500 million sumǵa shekem ssuda ajıratılıp, texnikum hám oqıw
oraylarında kásip óner laboratoriyası shólkemlestiriletuǵınlıǵı, jas
shańaraqlar ushın turaq jay ipoteka krediti stavkasınıń 14% ten asqan bólimi
mámleket byudjeti tárepinen qaplap beriletuǵınlıǵı, "Kitapqumarlıq
mádeniyatın rawajlandırıw" qorı arqalı ónerli jaslarımızǵa 20 million
sumnan pul ótkeriletuǵınlıǵı, mekteplerdegi eń belsendi kitapqumar jaslarǵa 10 million sumnan beriletuǵın
bolsa, "Ekinshi imkan" joybarı arqalı jazanı ótep bolǵan jaslar
zamanagóy IT-kásip hám xalıqaralıq tillerdi úyreniwde biypul oqıtılatuǵınlıǵı
sonday-aq, basqa da tarawlarda járdemler, imkaniyatlar berilip atırǵanlıǵın
aytıp ótemiz. Óytkeni Prezidentimizdiń ózi "Jaslardıń baslama hám
ideyaların qollap-quwatlaw, innovaciyalıq joybar hám startaplarına ámeliy
járdemler beriw arqalı jaslardı turaqlı bánt etiw, olardıń jámiyette óz ornın
tabıwı ushın sharayat jaratıp beriw baslı wazıypalarımnan biri", - dep atap
ótken edi.
Hár jılı 30-iyun "Jaslar
kúni" bayram sıpatında belgilenip kelinbekte. Iyun ayı bolsa "Jaslar
ayı" dep járiyalanıp, bul boyınsha hár kúni jaslar arasında túrli
mazmundaǵı ilajlar úlken kóterińkilik ruwxında ótkerilmekte. Jaslarǵa itibar-keleshekke
itibar. Xalıqtıń, Prezidentimizdiń jaslarǵa degen, olar arqalı keleshegimizge
degen itibarı kúshli. Bul iste men jaslarımız ózleriniń bilimlerin,
kúsh-ǵayratın aqılǵa uǵras jumsaydı dep oylayman.


REYMOV
Amanbay Mambetkarimovich, 

Xalıq
deputatları Qaraózek rayonlıq Keńesi 17-Jiyen jıraw okruginen deputat