Xalq deputatlari Chilonzor tumani Kengashining Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasining navbatdagi majlisi bo‘lib o‘tdi.

Majlisda doimiy komissiya a’zolari, tuman hokimligi hamda tuman Iqtisodiyot va moliya bo‘limi mas’ul rahbarlari ishtirok etdi.

Majlis davomida mas’ul tashkilotlar tomonidan taqdim etilgan hisobotlar, moliyaviy-iqtisodiy hisob-kitoblar hamda qaror loyihalari atroflicha muhokama qilindi.

Xususan, “Infratuzilma va ijtimoiy barqarorlik” jamg‘armasi mablag‘lari hisobidan ehtiyojmand oilalarni oziq-ovqat mahsulotlari bilan ta’minlash, ijtimoiy himoyaga muhtoj fuqarolarning uy-joylarini ta’mirlash, nogironligi bo‘lgan shaxslar uchun ijtimoiy xizmatlarni tashkil etish, inklyuziv ta’limni rivojlantirish hamda boshqa ijtimoiy ahamiyatga ega yo‘nalishlarni moliyalashtirish bo‘yicha takliflar ko‘rib chiqildi.

Shuningdek, “Tashabbusli budjet” loyihalari doirasida amalga oshirilgan ishlar, ajratilgan mablag‘larning maqsadli sarflanishi, fuqarolar tashabbusi jamg‘armasi mablag‘larining shakllanishi hamda g‘olib loyihalar ijrosi yuzasidan birinchi yarim yillik natijalar muhokama qilindi.

Muhokamalar yakunida doimiy komissiya tomonidan taqdim etilgan materiallar va hisobotlar yuzasidan tegishli xulosalar berilib, “Infratuzilma va ijtimoiy barqarorlik” jamg‘armasi mablag‘larini yo‘naltirish to‘g‘risidagi qaror loyihasi hamda “Tashabbusli budjet” jarayonining birinchi yarim yillik ijrosi haqidagi hisobotni Xalq deputatlari Chilonzor tumani Kengashining navbatdagi sessiyasi kun tartibiga kiritish tavsiya etildi.