Xalq deputatlari Qo‘qon shahar Kengashi deputati, Kengashning Mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi a’zosi X.Abdullayev hamda Kengash kotibiyati bosh mutaxassisi A.Adxamov tomonidan Qo‘qon shahar Soliq inspeksiyasida mahalliy byudjet daromadlari reja ko‘rsatkichlari hamda O‘zbekiston Respublikasining Byudjet kodeksi talablari ijrosi yuzasidan o‘rganish ishlari olib borildi.

O‘rganish jarayonida Soliq inspeksiyasi bosh inspektori A.Muxammedjanov ishtirokida joriy yilning ikkinchi choragi hamda iyun oyi bo‘yicha mahalliy byudjet daromadlari reja ko‘rsatkichlarining bajarilishi tahlil qilindi.

Ma’lum qilinishicha, 2026-yil II chorak uchun Qo‘qon shahri mahalliy byudjeti daromadlari rejasi 57 milliard 212 million so‘m etib belgilangan bo‘lib, amalda 63 milliard 395 million so‘m tushum ta’minlanib, reja 111 foizga bajarilgan.

Shuningdek, 2026-yil iyun oyi uchun mahalliy byudjet daromadlari rejasi 20 milliard 76 million so‘m etib belgilangan bo‘lsa, amalda 21 milliard 736 million so‘m tushum ta’minlanib, belgilangan reja 108 foizga ijro etilgani qayd etildi.

O‘rganish davomida O‘zbekiston Respublikasining Byudjet kodeksi talablariga muvofiq mahalliy byudjet daromadlarini shakllantirish, reja ko‘rsatkichlarini o‘z vaqtida va to‘liq bajarish, byudjetga tushumlarni oshirish hamda daromadlar bazasini kengaytirish borasida amalga oshirilayotgan ishlar muhokama qilindi.

Shuningdek, ushbu natijalarga erishishda qo‘shimcha daromad manbalarini aniqlash, soliq tushumlarini ko‘paytirish, yashirin iqtisodiyotga qarshi kurashish va soliq intizomini mustahkamlash bo‘yicha amalga oshirilayotgan chora-tadbirlar yuzasidan fikr almashildi.

Xalq deputatlari Qo‘qon shahar Kengashi