Oila muqaddasligi — jamiyat barqarorligi asosi

Xalq deputatlari Navoiy shahar Kengashi deputati Hasanova Gulshan Zokirovna tomonidan “Ma’rifat va Ziyokor” mahallasida oilalar mustahkamligini ta’minlash, ajrimlarning oldini olish hamda sog‘lom ma’naviy muhitni shakllantirish maqsadida profilaktik uchrashuv tashkil etildi.

Uchrashuv davomida ajrim yoqasiga kelib qolgan bir nechta oilalar bilan ochiq va samimiy muloqot olib borildi. Oilaviy munosabatlarda o‘zaro hurmat, bag‘rikenglik va mas’uliyatning ahamiyati haqida atroflicha tushuntirish ishlari amalga oshirildi.

Deputat Hasanova Gulshan Zokirovna tomonidan har bir murojaat va muammoga alohida yondashilib, tomonlarning fikrlari tinglandi hamda hayotiy misollar orqali oilani asrab qolishning ahamiyati tushuntirildi. Olib borilgan samarali muhokamalar natijasida 2 ta oila yarashtirilib, ularning kelgusida ahil va totuv hayot kechirishlari uchun zarur tavsiyalar berildi.

Mazkur tadbir mahallada tinchlik va barqaror oilaviy muhitni ta’minlash, yoshlar o‘rtasida sog‘lom turmush tarzini qaror toptirish hamda jamiyatda oila qadriyatlarini mustahkamlash yo‘lida muhim ahamiyat kasb etdi.