Xalq deputatlari Jizzax shahar Kengashiga O‘zLiDePdan saylangan deputatlar Sh.Umarov, Sh.Azimov, N.Xosilmurodovlar tomonidan O‘zLiDePning “Xalq bilan birga” umummilliy loyihasi doirasida Jizzax shahridagi “Kimyogar” mahallasida tashkil etilgan sayyor qabulda ishtirok etishdi. 

Mazkur tadbirda shahardagi 34 ta mahallalardan tashrif buyurgan 200 nafardan ortiq fuqarolarning 73 ta murojaati ko‘rib chiqildi.

Sayyor qabul davomida 205 ming nafardan ko‘proq aholi istiqomat qilayotgan Jizzax shahrida ko‘pchilikni tashvishga solayotgan elektr energiyasi va ichimlik suvi taʼminoti, ichki yo‘llarni taʼmirlash, aholi bandligini taʼminlash, “Yashil makon” umummiliy loyihasi doirasida ekilgan ko‘chatlarni sug‘orish tizimini yaxshilash, imkoniyati cheklangan fuqarolar uchun o‘quv kurslari tashkil etish kabi dolzarb muammolar bilan bir qatorda, ishga joylashish, sog‘lig‘ini tiklash uchun moddiy yordam ko‘rsatish kabi fuqarolarning shaxsiy masalalari ham mutasaddi va mutaxassilar ishtirokida atroflicha muhokama qilindi.

Aholi murojaatlarining 32 tasi shu joyning o‘zida ijobiy yechim topdi. Ayrim masalalar bo‘yicha huquqiy maslahatlar ham berildi. Qo‘shimcha vaqt talab etadigan masalalar esa deputatlar va masʼullar nazoratiga olindi.