🔷Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq Kengash raisi O.Babayev, deputatlar M.Ashurov, J.Sadirov, kotibiyat xodimi M.Tursunbayevalar tomonidan Axborot-kutubxona markazi faoliyati o‘rganildi.
🔷O‘rganish davomida kutubxonada aholi, ayniqsa yoshlarning kitobxonlik madaniyatini oshirish, ularning bo‘sh vaqtlarini mazmunli tashkil etish hamda ma’naviy-ma’rifiy saviyasini yuksaltirish borasida amalga oshirilayotgan ishlar bilan yaqindan tanishildi.
Kutubxona fondida jahon adabiyoti namunalari, o‘zbek va rus yozuvchilarining asarlari, shuningdek, milliy uyg‘onish davri vakillari bo‘lgan jadidchilar merosiga oid kitoblar alohida o‘rin egallagani qayd etildi. Xususan, Abdulla Qodiriy, Cho‘lpon, Abdulla Avloniy, Fitrat kabi ma’rifatparvar adiblar asarlari kitobxonlar tomonidan katta qiziqish bilan mutolaa qilinayotgani ta’kidlandi.
Shu bilan birga, axborot-kutubxona markazida zamonaviy talablar asosida elektron kitoblar bazasi shakllantirilgan bo‘lib, kitobxonlarga raqamli xizmatlar ko‘rsatish yo‘lga qo‘yilgan. Elektron kitoblardan foydalanish uchun kompyuter jihozlari va internet tarmog‘i imkoniyatlaridan samarali foydalanilayotgani deputatlar tomonidan ijobiy baholandi.
 

🔷O‘rganish jarayonida kutubxona binosining holati, mavjud sharoitlar ham ko‘zdan kechirildi. Xalq deputatlari tuman Kengashining tegishli qaroriga asosan mahalliy budjetining qo‘shimcha manbalari hisobidan Axborot-kutubxona markazini ta’mirlash hamda uning moddiy-texnika bazasini mustahkamlash uchun ajratilgan 250,0 mln. so‘m mablag‘lar hisobidan rejalashtirilgan ishlar bilan tanishildi.

🔷Deputatlar tomonidan kutubxonada kitobxonlar uchun yaratilgan sharoitlar, xodimlarning faoliyati hamda kitob fondini boyitish borasidagi ishlar e’tirof etildi. Shu bilan birga, yoshlarni kitobxonlikka keng jalb qilish, elektron xizmatlar ko‘lamini yanada kengaytirish va kutubxona infratuzilmasini zamonaviylashtirish yuzasidan tegishli taklif va tavsiyalar berildi.

🔷Ta’kidlanganidek, aholining ma’naviy-ma’rifiy dunyoqarashini yuksaltirishda axborot-kutubxona markazlari muhim o‘rin tutadi va bu boradagi ishlar kelgusida ham deputatlar e’tiborida bo‘ladi.