Xalıq deputatları Jizzaq wálayatı Keńesi menen birgelikte Shımbay rayonında shólkemlestirilgen oqıw seminarı

⚡️ Shımbay rayonında Xalıq deputatları Jizzaq wálayatı Keńesi menen birgelikte deputatlar hám Keńes apparatı xızmetkerleriniń kásiplik bilimlerin arttırıw, jergilikli Keńeslerdiń jumısın nátiyjeli shólkemlestiriw, deputatlıq jumıstı jáne de jetilistiriw maqsetinde oqıw seminarı shólkemlestirildi.

Ilajda Jizzaq wálayatı kelgen deputatlar delegatsiyası, Qaraqalpaqstan Respublikası Joqarǵı Keńesiniń komitet baslıǵı Sh.Ótemisov, Xalıq deputatları Shımbay rayonlıq Keńesi baslıǵı O.Tolıbekov hám rayonlıq Keńes deputatları qatınastı hám de Xalıq deputatları Shımbay rayonlıq Keńesiniń Korrupciyaǵa qarsı gúresiw hám qáwipsizlik máseleleri boyınsha turaqlı komissiyası tárepinen 2026-jıldıń usı kúnge shekem ámelge asırılǵan jumısları haqqındaǵı esabatı tıńlandı.

Seminarda xalıq deputatları Keńesleriniń sessiyaların, turaqlı komissiyalar májilislerin hám deputatlardıń saylaw okruglerindegi jumısların nátiyjeli shólkemlestiriw, xalıq penen ashıq-aydın pikirlesiw ornatıw, puqaralardıń múrájatların kórip shıǵıw, kóterilgen máselelerdi jergilikli Keńeslerdiń wákillikleri sheńberinde sheshiw boyınsha pikir alısıwlar ótkerildi.

Sonday-aq, deputatlıq sorawlardı kirgiziw, Keńes qararlarınıń orınlanıwın qadaǵalaw, normativlik-huqıqıy hújjetlerden paydalanıw hám deputatlardıń xalıq aldındaǵı esap beriwin kúsheytiw máselelerine ayrıqsha itibar qaratıldı.

Oqıw seminarınıń barlıǵında Jizzaq wálayatı Keńesiniń aldıńǵı tájiriybesi úyrenilip, Shımbay rayonında bul tájiriybeni jergilikli sharayattan kelip shıqqan halda qollanıw boyınsha usınıslar bildirildi.

Seminar sońında deputatlar ózlerin qızıqtırǵan máseleler boyınsha pikir alısıp, jergilikli Keńeslerdiń jumısın jáne de jetilistiriwge qaratılǵan usınısların bildirdi.