ЗАМОНАВИЙ ТИББИЙ ЖИҲОЗЛАР — СИФАТЛИ ТИББИЙ ХИЗМАТ КАФОЛАТИ
Мамлакатимизда инсон қадрини улуғлаш, аҳоли саломатлигини муҳофаза қилиш ва тиббий хизматлар сифатини ошириш давлат сиёсатининг устувор йўналишларидан бири ҳисобланади. Кейинги йилларда соғлиқни сақлаш тизимини такомиллаштириш, тиббиёт муассасаларининг моддий-техник базасини мустаҳкамлаш ҳамда уларни замонавий асбоб-ускуналар билан жиҳозлаш борасида кенг кўламли ишлар амалга оширилмоқда.
Айниқса, шаҳар ва қишлоқ ҳудудларидаги оилавий поликлиникалар, оилавий шифокорлик пунктлари, марказий шифохоналар ва бошқа тиббиёт муассасаларини замонавий ташхислаш ҳамда даволаш ускуналари билан таъминлашга алоҳида эътибор қаратилмоқда. Бу эса аҳолининг узоқ масофага бормасдан, ўз ҳудудида сифатли тиббий хизмат олиши учун қулай имконият яратмоқда.
Замонавий ультратовуш, рентген, лаборатория, кардиология ва бошқа ташхислаш ускуналарининг амалиётга жорий этилиши касалликларни дастлабки босқичда аниқлаш, беморга аниқ ташхис қўйиш ҳамда самарали даволаш чораларини белгилаш имконини бермоқда. Тез тиббий ёрдам бўлимларининг зарур жиҳозлар билан таъминланиши эса шошилинч ҳолатларда инсон ҳаётини сақлаб қолишда муҳим аҳамият касб этади.
Шу билан бирга, тиббиёт соҳасида рақамли технологиялардан фойдаланиш кўлами ҳам кенгаймоқда. Электрон тиббий маълумотлар базаси, онлайн навбат, электрон йўлланма ва рецепт тизимларининг жорий этилиши ортиқча оворагарчиликларни камайтириб, беморларга тезкор ва қулай хизмат кўрсатишга ёрдам бермоқда. Тиббиёт муассасаларини компьютер техникаси ва барқарор интернет тармоғи билан таъминлаш ҳам мазкур жараённинг муҳим қисми ҳисобланади.
Албатта, муассасага замонавий асбоб-ускунани етказиб беришнинг ўзи етарли эмас. Ундан тўғри ва самарали фойдалана оладиган малакали мутахассислар ҳам зарур. Шу сабабли шифокорлар, ҳамширалар ва лаборатория ходимларининг билим ҳамда амалий кўникмаларини мунтазам ошириб бориш, уларни янги тиббий технологиялар билан ишлашга ўқитиш муҳим вазифалардан биридир.
Бундан ташқари, тиббий жиҳозларнинг доимий соз ҳолатда ишлашини таъминлаш, уларга ўз вақтида техник хизмат кўрсатиш ва эҳтиёт қисмлар билан таъминлаш масаласига ҳам жиддий ёндашиш лозим. Чунки фойдаланилмай турган ёки носоз ҳолатга келган ускуна аҳолига кўрсатиладиган тиббий хизмат сифатига салбий таъсир кўрсатиши мумкин.
Депутатлик ўрганишлари жараёнида тиббиёт муассасаларидаги мавжуд асбоб-ускуналарнинг ҳолати, уларга бўлган эҳтиёж, жиҳозлардан фойдаланиш самарадорлиги, дори-дармонлар таъминоти ҳамда беморлар учун яратилган шарт-шароитларга алоҳида эътибор қаратилиши зарур. Аниқланган камчиликларни бартараф этиш юзасидан мутасадди ташкилотларга депутатлик сўровлари юбориш, асослантирилган таклифлар киритиш ва уларнинг ижросини назорат қилиб бориш муҳим аҳамиятга эга.
Тиббиёт муассасаларининг моддий-техник базасини мустаҳкамлашда маҳаллий бюджет маблағлари, давлат дастурлари, ташаббусли бюджет лойиҳалари ва ҳомийлик имкониятларидан самарали фойдаланиш лозим. Бунда, энг аввало, аҳолининг ҳақиқий эҳтиёжларини ўрганиб, зарур жиҳозларни манзилли равишда етказиб беришга устувор аҳамият қаратилиши керак.
Хулоса қилиб айтганда, тиббиёт муассасаларини замонавий асбоб-ускуналар билан таъминлаш — шунчаки моддий базани яхшилаш эмас, балки инсон ҳаёти ва саломатлигига киритилаётган муҳим сармоядир. Ҳар бир фуқаронинг сифатли, малакали ва тезкор тиббий хизматдан фойдаланишини таъминлаш барчамизнинг умумий вазифамиздир.
Бу йўналишдаги ишларни изчил давом эттириш, аҳоли эҳтиёжларини мунтазам ўрганиш ҳамда депутатлик ва жамоатчилик назоратини кучайтириш орқали тиббий хизматлар сифатини янада юқори босқичга олиб чиқиш мумкин.